ЗТБХБСайд Ц.Дашдорж Нийслэлийн Барилга, хот байгуулалт, төлөвлөлтийн газарт өчигдөр айлчиллаа. Манай газраас ЗТБХБСайд Нийслэлийн Засаг дарга бөгөөд Улаанбаатар хотын Захирагч нарын байгуулсан 2009-2012 хамтран ажиллах Санамж бичиг хүрээнд хийгдсэн ажлын явц, “Улаанбаатар хотыг 2030 он хүртэл хөгжүүлэх хөгжлийн чиг хандлага, “Улаанбаатар хотыг 2020 он хүртэл хөгжүүлэх ерөнхий төлөвлөгөө”-ний тодотголын талаар танилцууллаа. Мөн “100 000 айлын орон сууц хөтөлбөр”-ийн хүрээнд баригдах хорооллуудын инженерийн шугам сүлжээг хонгилын системээр зохион байгуулах, гэр хорооллын барилгажилт, дэд бүтэц, хууль эрх зүйн орчин, авто зам, ногоон байгууламж, туул сэлбэ голын урсац, хөрсний усыг ашиглах төслийн талаар тус тус танилцуулга мэдээлэл хийсэн. Хот төлөвлөлтөд тулгарч буй хүндрэлийг багасгахын тулд “Шинэ бүтээн байгуулалт” дунд хугацааны зорилтот хөтөлбөрийг хэрэгжүүлэх ажлыг онцгой анхаарах нь зүйтэй хэмээн үзэж байна. Ингэхдээ хөтөлбөрийн хүрээнд барих барилгуудын дулаан, цахилгаан, усны эх үүсвэр болон Засгийн газрын хүрээнд эрчим хүчний тав дахь эх үүсвэрийг барих ажлыг түргэтгэх шаардлагатай байгааг салбар хариуцсан сайд онцолж байлаа. Уулзалтын дараа сайд болон холбогдох мэргэжилтнүүд 40 мянгатад 2011 онд баригдсан 200 метр урттай хонгилын системтэй танилцав. Монголд анх удаа баригдсан инженерийн шугам сүлжээг байрлуулсан хонгилын системийг 950 сая төгрөгийн өртгөөр байгуулсан. Улаанбаатар хотын Ерөнхий архитектор Э.Хүрэлбаатар “Улаанбаатар хотын инженерийн шугам сүлжээг нийтэд нь яг ийм тунелийн системд шилжүүлчихвэл зундаа засварлахаар хөрсийг нь хуулж, намартаа хучдаг газар шорооны ажил зогсч, төсвийн хөрөнгө хэмнэх давуу талтай” хэмээн онцолсон юм.