Өөрийн гэсэн орон гэртэй байна гэдэг сэтгэл амар, тайван амьдрах үндэс суурь нь болдог. Бага дунд орлоготой иргэд 1жилийн 6%-ийн хүүтэй орон сууцны зээл олгохоор болсон бол орцны жижүүр хийж амьдардаг гэр бүл орон сууцтай болох боломжтой болсон таатай мэдээ байна. Орц цэвэрлэн шатны доод хонгилын агааргүй нарны гэрэл орохгүй  нэг метр өргөнтэй, гурван метр хэрийн урттай чийглэг орчинд 4-5 ам бүл амдарч байна. Үүнийг “орцон дахь гэр бүл” гэж тодорхойлчихоод байгаа. Шатны доод хонгилд хүн тэр дундаа Монгол Улсын ирээдүй хойч үе болсон балчирхан үрс амьдарч байна гэхэд өрөвдмөөр харамсмаар.

    Тиймээс Нийгмийн Хамгаалал, Хөдөлмөрийн Яамнаас орцонд жижүүр хийдэг, амьдардаг гэр бүлүүдийг орон сууцжуулах зорилгоор “Шилжих хөдөлгөөн ба орцон дахь гэр бүлүүд” гэсэн төсөл хэрэгжүүлж эхэлсэн билээ.

    Энэ төслийнхөө хүрээнд НҮБ-ийн “Хабитат” төрийн бус байгууллагатай хамтран Сонгинохайрхан дүүргийн 21 дүгээр хороо буюу “Рашаант” өртөөний хавьд газар авч бяцхан хотхон байгуулахаар ажиллаж байна. Хотхонд эхний ээлжинд 50 өрхийг хамруулах бөгөөд 7 сая төгрөгөөр 42м²-тай байрнуудыг барихаар төлөвлөж байгаа юм.

     Гэхдээ эдгээр 50 өрхөд зүгээр энэ хотхоныг байгуулаад өгчих биш энэ орон сууцанд орохыг хүссэн гэр бүл эхний ээлжинд 7 сая төгрөгний 40%-ийг төлөөд байшиндаа орох боломжтой юм. Харин байшингийн урьдчилгаа төлбөрийг МУ-ын ЗГ-аас эх орны хишиг 21,000 төгрөг болон хувьцаа хэлбэрээр иргэддээ тарааж байгаа 1сая төгрөгөө шилжүүлэн хэрэглэж болох юм байна.