“Шинэ бүтээн байгуулалт” дунд хугацааны зорилтот хөтөлбөрийн хүрээнд 100 мянган айлын орон сууцыг барих төсөл хэрэгжиж байгаа билээ. Энэ хүрээнд тодорхой шалгуур хангасан иргэдэд зургаан хувийн хүүтэй 50 саяын зээл олгох юм. Зээлд хамрагдахыг хүссэн иргэдийн материалыг гуравдугаар сарын 12-ноос эхлэн ОССК-д хүлээн авна. Үүнтэй холбогдуулан Зам тээвэр, барилга, хот байгуулалтын яам, Орон сууц санхүүжилтийн корпораци, дүүргүүдийн газрын алба гуравдугаар сарын 6-нд хамтран хуралдсан юм. Хурлаар эхний ээлжинд нийслэлийн Баянгол, Баянзүрх, Чингэлтэй, Сүхбаатар, Сонгинохайрхан, Хан-Уул дүүргүүдэд баригдаж буй барилгуудын гүйцэтгэлийг тогтоохоор аль чиглэлд ямар журмын дагуу мэргэжилтнүүд ажиллах тухай чиглэл өгсөн юм. Улмаар томилогдсон мэргэжилтнүүд өнгөрөгч өдрүүдэд шалгалт хийж, ажлын тайлан буюу барилгуудын гүйцэтгэлийн тухай мэдээллийг нэгдсэн журмаар эмхэтгэж буй аж. 2016 он хүртэл 100 мянган айлын орон сууцыг барих ажил одоогийн байдлаар 28,6 хувьтай байгаа тухай албаныхан мэдээлж байна. Тус хяналтын дүнгийн урьдчилсан байдлаар барилгуудын гүйцэтгэлийг хувиар тооцож үзвэл

Баянгол дүүрэг 40,3%
Чингэлтэй дүүрэг 0
Баянзүрх дүүрэг 21,1%
Сүхбаатар дүүрэг 22,2%
Сонгинохайрхан дүүрэг 65%
Хан-Уул дүүрэг 22,7 хувийн гүйцэтгэлтэй  байгаа гэнэ. Харин эдгээр дүүрэгт ямар барилга хэдэн хувьтай байгаа гэдэг мэдээлэл одоогийн байдлаар хараахан гараагүй байна. Хэрэв энэхүү мэдээлэл гарвал иргэд өөрсдийн бүрдүүлэх материалаа бэлэн болгоод, орон сууцныхаа барилгын гүйцэтгэлийг мэдэж авч, сонголтоо хийхэд нэн ач холбогдолтой болох юм. Энэ талаар Зам тээвэр, барилга, хот байгуулалтын яамны Газрын харилцаа, барилга, геодези зураг зүйн газрын дарга  Ц.Ганхүүгээс тодрууллаа.

-Барилгын гүйцэтгэлийн нэгдсэн дүн гараагүй ч барилгажилт ямар шатандаа явж буй талаар мэдээлэл өгөхгүй юү?

    Одооний байдлаар 18 сарын дотор баригдаж дуусах 28300 айлын орон сууц байна. Зарим нь эхлэх шатандаа, зарим нь эхлээд явж байгаа. Засгийн газрын 341 дүгээр тогтоол гарахад л барилгынх нь ажил 90 хувьтай явж байсан компаниуд ч байна. Ерөнхийдөө саяын судалгаагаар 28-аад хувийн гүйцэтгэлтэй байгаа тухай мэдээлэл байна. Иргэдэд хамгийн их хэрэгтэй байгаа, нийслэлд баригдах 74 мянган айлын орон сууцаас хичнээн нь эхлээд, одоо ямар хувийн гүйцэтгэлтэй байгаа болох, үүнээс 55 м.кв талбайтай барилга болон түүнээс доош талбайтай, хаана ямар компани барьж байгаа тухай мэдээллийг өнөөдрийн байдлаар нэгтгэж байна.

     Орон сууцны талбайн асуудал бол 55 м.кв болон түүнээс доош байх ёстой. Улсаас 50 сая төгрөгийг л шийдэж чадна. Илүү гарвал иргэн, арилжааны банк хоорондын шийдэх асуудал болно. Хамгийн гол нь төрийн зүгээс арилжааны банкуудыг иргэдэд зээл олгохдоо урьдчилгаа төлбөр болгож заавал 30 хувийн төлбөр гэхгүй, 10 хувь байлгах тухай голчилж байна. Иргэд 30 хувь гэвэл төлж чадах нь хэр билээ. Ер нь аль болох бага орлоготой иргэдийг байраар хангах, зээлд хамруулж бага талбайн хэрэгцээг л шийдэж чадаж байна гэсэн үг юм.
    ОССК-иас хөтөлбөрт багтсан орон сууцны жагсаалтыг гаргасан. Гэтэл түүнд хувь хүний нэр дээрх орон сууц барих жагсаалт багтсан байсан. Энэ тухай тайлбар өгөхгүй юү?
     ОССК-иас гаргасан жагсаалтын тухайд орон сууц барих газар эзэмшигчийн нэрээр жагсаасан байгаа. Иргэн аль нэг аж ахуй нэгжтэй хамтарч өөрийн нэр дээр байгаа газарт орон сууц барина гэсэн гарц юм.