УИХ-ын дарга Д.Дэмбэрэл Дархан-Уул аймагт ням гаригт ажиллалаа. Тус аймагт барих газрын тос боловсруулах үйлдвэрийн шав тавих ёслолд оролцсон байна. Монгол, Японы хамтарсан газрын тос боловсруулах энэхүү үйлдвэр байгуулагдсанаар монголчууд хэрэгцээт бензин шатахууныхаа ихэнх хэсгийг дотоодын үйлдвэрлэлээрээ хангаад зогсохгүй стратегийн энэ чухал түүхий эдийн нэг орны хараат байдлаас гарах боломж бүрдэх юм.

Улсын Их Хурлын дарга эх орондоо газрын тос боловсруулах үйлдвэртэй болох асуудалд ихээхэн ач холбогдол өгч анхаарал тавин энэ асуудлыг судалж санал дүгнэлт боловсруулах үүрэгтэй ажлын хэсэг байгуулж ажиллуулсан аж. Ажлын хэсгийн санал дүгнэлтийг Улсын Их Хурал хэлэлцэн тогтоол гаргасны дагуу газрын тосыг эх орондоо боловсруулж дотоодын хэрэгцээгээ хангах ажлын эхлэл ийн тавигдаж байна.