Нийтийн аж ахуйн салбарын байгуулагуудын сургалт боллоо
“Монголын нийтийн аж ахуйн холбоо”-ноос зохион байгуулсан ”Салбарын байгууллагуудын үйл ажиллагаатай танилцах, туршлага судлах” сургалтад яам, агентлагын холбогдох мэргэжилтэнүүд болон нийтийн аж ахуйн салбарын төр, хувийн хэвшлийн байгууллагын 34 хүн 2011.05.25-наас 05.30-ны өдрүүдэд хамрагдаж Өмнөговь аймгийн НААҮ-ний “Гүний ус” ХХК болон тус аймгийн Цогтцэций суманд үйл ажиллагаа явуулдаг “Ухаа худаг ус хангамж” ХХК-ийн үйл ажиллагаа, нэвтрүүлж буй дэвшилтэт шинэ техник, технологитой газар дээр нь танилцсан.
ӨМНӨГОВЬ АЙМГИЙН НААҮ-НИЙ “ГҮНИЙ УС” ХХК
Тус компани нь анх 1954 онд аймгийн төвийн ус хангамж, хог хаягдлын vйлчилгээг хариуцсан "Халуун ус" нэртэйгээр байгуулагдсанаас хойш үйл ажиллагааны цар хүрээ, хэрэгцээ шаардлагаар нэр нь хэдэнтээ өөрчлөгдөж 2001 оноос “Гүний ус” ХХК болон өнөөг хүртэл Даланзадгад хотын хүн амыг стандартын шаардлагад нийцсэн ундны усаар хангах, хэрэглээнээс гарсан бохир усыг татан зайлуулах, цэвэрлэх, хог хаягдлыг цуглуулан ангилан ялгаж боловсруулалт хийх зэрэг үйлчилгээг үзүүлж байна. Өнөөдрийн байдлаар 90 гаруй ажилтан ажиллагсад, инженер техникийн мэргэжлийн чадварлаг боловсон хүчинтэй, үйлчилгээний 7 салбартайгаар, барилга угсралт, нийтийн аж ахуйн үйлчилгээ эрхлэх тусгай зөвшөөрөлтэйгээр үйл ажиллагаа явуулж байна.
“Гүний ус” ХХК нь харилцагч байгууллага, хэрэглэгчдийн найдвартай түнш нь байж, тэдэнд олон улсын стандартын түвшинд хүрч, шалгагдсан соёлтой үйлчилгээ үзүүлэхийн төлөө үйл ажиллагаандаа олон улсын стандартыг мөрдөж ажиллах, орчин үеийн дэвшилтэт шинэ техник, технологи нэвтрүүлэх, хэрэглэгчдэд үйлчилгээгээ ойртуулахыг эрхэмлэн тэдний итгэлийг хүлээсэн компани байх зорилт тавин ажиллаж байна. Тухайлбал гэр хороолол байрлах ус түгээх 25 байрыг төвлөрсөн системд холбож, ус хангамж, ариутгах татуургын шугам сүлжээг хуванцар хоолойгоор сольж шинэчлэн, айл өрх, албан байгууллагын усны хэрэглээг тоолуураар тооцож байна.
“ЭНЕРЖИ РЕСУРС” КОМПАНИЙН“УХАА ХУДАГ” ТӨСӨЛ
“Энержи Ресурс” компани нь Өмнөговь аймгийн Цогтцэций сумын нутаг дахь “Ухаа Худаг” коксжих сайн чанарын нүүрс, нүүрсэн бүтээгдэхүүнээр олон улсын зах зээлд өрсөлдөх, “Монгол”-оор овоглосон тэргүүлэгч зэргийн коксжих нүүрсний брэндийг бий болгохоор үйл ажиллагааныхаа үе шат бүхэнд олон улсын стандартыг мөрдлөг болгон ажиллаж байна. Уул уурхайн салбарын дотоодын болон олон улсын зах зээлийн шилдэг туршлага дээр үндэслэн “Ухаа Худаг” төслийг богино хугацаанд дэлхийн жишигт нийцсэн уурхай болгон хөгжүүлэхээр зорилт тавин ажиллаж байна. Энержи Ресурс компанийг М-Си-Эс групп, Петровис ХХК, Шунхлай групп зэрэг дотоодын зах зээлд танигдсан, үндэсний хэмжээний томоохон компаниудын хамтын хөрөнгө оруулалттайгаар байгуулсан бөгөөд дэлхийн 61 оронд үйл ажиллагаа явуулдаг олон улсын санхүүгийн байгууллага болох Европын Сэргээн босголт хөгжлийн банк 2009 онд тус компанийн хувь нийлүүлэгчдийн нэг болсон байна.
“Энержи Ресурс” компани нь нүүрс баяжуулах үйлдвэрээс гадна, 18 мегаваттын цахилгаан станц, ус хангамж, ариутгах татуургын иж бүрэн байгууламжууд, орон сууцны хороолол болон автозам, төмөрзам зэрэг дэд бүтэц, инженерийн хангамжийн олон чухал төсөл хэрэгжүүлж, “Ухаа Худаг”-ийн хөндийд их бүтээн байгуулалтыг өрнүүлж байна.
“УХАА ХУДАГ УС ХАНГАМЖ”
Хүн амын ажиллаж амьдрах таатай нөхцөлийг бүрдүүлэх амин чухал зүйл нь “Ус” юм. “Ухаа худаг ус хангамж”ХХК нь “Наймандайн хөндийд” орших 12ш гүний худаг бүхий 43 км урт шугам сүлжээ, 2-р өргөлтийн насос станц, 500 м3–н усан сан, ус цэвэршүүлэх үйлдвэрээр дамжуулан хоногийн 24 цагийн туршид Цогтцэций сумын хүн ам, уурхайн ажилтан ажиллагсдыг эрүүл ахуйн шаардлагад нийцсэн ундны усаар тасралтгүй, найдвартай ханган ажиллаж байна. Мөн түүнчлэн үйлдвэрлэлийн технологийн үйл ажиллагааг тасралтгүй хангах Канад улсын технологиор барьж ашиглалтад оруулсан Майга уулын 2х28000м3 усан сан нь Монгол Улсын хамгийн том усан сан юм. Энэхүү усан сан нь ус шүүрэх, ууршихаас бүрэн хамгаалагдсан ус үл нэвчүүлэх дэвсгэр бүхий хучааcтай, хучлага нь усны гадаргуу дээр завь шиг хөвж байдаг ба усны түвшин өөрчлөгдөхөд мөн адил дээшилж, доошилдог. Энэ уян хатан бүрхүүл нь усан сангын бетонон, ган болон бусад материалаар хийсэн хучлагнаас бага өртөгтэй ба хучихад хялбар байдаг байна.
“Ухаа худаг ус хангамж” ХХК нь ус хангамжийн систем, усны менежментийг Олон улсын түвшинд хүлээн зөвшөөрөгдөх хэмжээнд Монгол инженерүүдийн мэдлэг чадвараар “Ногоон стандарт”-ыг хангасан ус хангамжийн иж бүрэн системийг цогцлоон бүтээж байна.
