Гэрийн буг ч юмуу, хий үзэгдэл эсвэл барабашкагийн талаар бол биш шүү. Харин та бүхэнд барилгын агааржуулалт, салхивчийн талаар цөөн хэдэн мэдлэг хүргэе гэж зорилоо.

Та бүхэний зарим нэг нь мэдэх байх...

Салхивичийн хоолой исгэрч дуугарах, жорлон эсвэл ОО өрөө хүв хүйтэн болчих, гал тогооны цонх хөлрөх, хананы буланд мөөгөнцөр үүсэх, хаалга үүд савах, утаа орж ирэх, бохир үнэртэх, шугам хөлдөх гээд л асуудлууд тулгарч байсан бол танайх салхивч, агааржуулалтын асуудалтай байгаа гэж ойлгож болно.

Салхивчын тухай ярилцахаас өмнө барилга байгууламжын гадна орчин, агаарны төлөв байдлын тухай ойлголт хэрэгтэй.

Агаар гэдэг нь 78% азот, 21% хүчилтөрөгч,1% инертийн хий, нүүрс хүчлийн хий, хүхрийн эсэл бусад хийнээс бүрдэнэ. Бидний агаарын бохирдол гэж нэрлээд байдаг хийнүүд болох СО2 (0.05%), SO2 (0.02%) тус тус байх ёстой боловч үүнээс хэтэрхий их болсоныг бид уушгиараа жигтэйхэн сайн мэдэрч байгаа билээ.

Аливаа агаарын урсгал нь түүний нягт, даралтын нөлөөнөөс үүсдэг бөгөөд хүйтэн агаар хүнд даралт ихтэй байдаг байхад, халуун агаар эсрэгээр байдаг юм. Хэрэв та ажигласан бол халуун өдөр цонх, хаалгаа онгойлгосон байсан ч барилга дотор сэрүүн харин хүйтэн өдөр барилга дотор халуун байдаг ч цонх, хаалга нээхэд л тэр дороо хүйтэн болчихдог.  Энэ нь өнөөх л халуун агаар бага даралттай учир их дэгдэмхий, харин хүйтэн агаар их даралттай бол хүнд гэдгээр тайлбарлагдана. Барилгын салхивчийн систем энэ зүй тогтол дээр л үндэслэгдсэн гэж ойлгоход болно.

Барилгын салхивчийн системийг ердийн ажиллагаатай, механик ажиллагаатай гэж хуваах ба Агаарын жингийн ялгаварын даралтыг ашиглан төлөвлөсныг ердийн ажиллагаатай, агаарыг өвөл, хавар намрын улиралд халаж, чийгшүүлж, зуны улиралд хөргөж, чийгшүүлэх мөн шүүж, сорох, өгөх үйл ажиллагааг механикжуулсаныг механик үйл ажиллагаатай салхивчийн систем гэж нэрлэнэ.

Энгийн үгээр тайлбарлавал хэрэв танай салхивчийн системд ямар нэгэн сэнс, автомат хаалт зэрэг тоног төхөөрөмж байхгүй бол энгийн эсрэг бол механик гэж ойлгоход болно. Хуучны угсармал болон тоосгон барилгууд ердийн үйл ажиллагаа бүхий салхивчийн системтэй байдаг.

Миний дээр дурьдсан асуудлууд ихэнхдээ ердийн үйл ажиллагаатай салхивчийн системд гардаг проблемууд бөгөөд ихэнхдээ гол шалтгаан нь буруу төлөвлөлт, тухай орчины цаг уурын байр байдлыг тооцоонд буруу хэрэглэсэн, угсралтын алдаануудаас болдог.

Нийтлэг гардаг салхивчийн алдаануудыг дурьдаж шалтгааны нэрлэвэл дараах байдлаар хувааж үзэж болно.

1.       Угаалгын өрөө болон 00 өрөөний үнэр, чийг гадагшлахгүй байх.

Танай салхивчийн систем ажиллахгүй байна. Тйимээс агаар солилцоо зогссон байна гэж үзэж болно. Салхивчийн системыг зөв буруу угсарсан эсэхийг мэргэжлийн хүнээр шалгуулах, бөглөрсөн эсэхийг мэдэх шаардлагатай ба энэ тохиолдолд систем хэрэв бөглөрөөгүй байгаа бол албадмал үйл ажиллагаатай салхивчийн сэнс тавих, тус өрөөний хаалгануудад жижиг сараалж хийж өгөх

2.       Гал тогооны өрөөний цонх хөлрөх, хана мөөгөнцөрдөх

Сүүлийн үеийн барилгад түүн дотроо вакуум цонхтой айлд ихээхэн үзэггдэг асуудал болсон. Энэ нь мөн л агаарийн солилцоо байхгүйгээс хоол, цайны уур цан гадагшилж чадахгүй цонхон дээр очиж бууж байгаа үзэгдэл юм. Цонх онгойлгох гэхээр даараад, хаачихаар хөлрөөд байдаг бол цонхондоо жижиг салхивч хийлгэх шаардлагатай ба гал тогооны салхивчийн хоолойгоо мөн дээр дурьдсан шиг шалгаж үзэхийг зөвлөе. Тэгээд бас гэртээ угаасан юм хатаадагаа болих хэрэгтэй шүү.

3.       Салхивчийн систем үлээгээд байвал

Салхивчийн систем чинь хүйтрэхээр үлээгээд, халахаар сороод байна уу? Эсвэл байнгын үлээлтэй байдаг уу? Угаалганы өрөө, ОО өрөө чинь гадаа байгаа шиг байна уу? Хэрэв тийм бол мэргэжлийн хүнээс зөвлөгөө авсан дээр шүү. Энэ миний түрүүний дурьдсан зураг төслийн тооцоо эсвэл угрсалтын үйл ажиллагааны үед алдсан алдаанууд байж болно.

4.       Айлын хоол хийж байгаа үнэр, хажуу айлын бохир үнэртээд байдаг бол

Хэрэв яг ийм асуудал үүсээд байвал угсралтын алдаа гэж ойлгож болно. Эсвэл хэн нэгэн нь чаддаг баатар болж салхивчийн системээ эвдсэн ч байж болно. Бөглөрсөн эсэхийг шалгаарай. Тэгээд мэргэжлийн хүнд л хандсан нь дээр..

5.       Шугам хоолой чинь хөлдөөд байвал

Барилгын шугам сүлжээ ихэнх тохиолдолд барилгын салхивчийн системтэй цуг төлөвлөгддөг. Тиймээс нэг суваг хоолойнд цуг явуулах нь элбэг байдаг ба энэ тохиолдолд давхар бүрийн хучилтанд уг суваг, хоолойг битүүлж өгөх шаардлагатай байдаг. Мөн дээврийн шахтыг дулаалах, хучилтыг хийх зэрэг болно. Эдгээрийг хийгээгүйгээс шугам хоолой хөлдөнө. Мөн хэтэрхий сороллтой байгаа салхивчийн хоолой дэргэдэх шугамаа хөлдөөдөг. Мэргэжлийн хүнд ханд!

За тэгээд өөр дэлгэрүүлбэл өчнөөн л юм ярьж болж байна. Гэхдээ салхивчийн системийн талаар яривал дуусахгүй сэдэв болох ба таньд энэ талаар проблем гарвал мэргэжлийн хүнд хандах нь зүйтэй шүү гэдгийн дахиад л хэлчихий.

Б.Мөнхбаатар