Зүүн бүсийн ГХБХБГ-ын 8 дахь удаагийн чуулга уулзалт болов
Жил бүр уламжлал болгон зохиогддог зүүн бүсийн ГХБХБГ-ын чуулга уулзалт байгалийн үзэсгэлэн цогцолсон эртний галт уулын орон Сүхбаатар аймгийн Дарьганга суманд 2011 оны 06 дугаар сарын 10-13-нд амжилттай болж өндөрлөлөө.
Сүхбаатар аймгийн Дарьганга сум нь Монгол орны зүүн өмнөд хязгаарт байрлах бөгөөд алтран шаргалтах Молцог, Онгон элс, талын нүд болсон Ганга, Дуут нуур, анагаах рашаан болсон Эрээн толгой, Оргих, Дагшин булаг, эрийн хийморь сэргээсэн Алтан Дарь овоо, Шилийн богд, Зотолхаан зэрэг уулс, Дарьганга ардын уртын дуу, алт, мөнгөний урлал зэргээрээ улс орондоо алдартай билээ.
Чуулганд ЗТБХБЯ-ны Хот байгуулалт, газрын харилцааны бодлогын газрын орлогч дарга Д.Мөнхбаатар, ГХБГЗЗГ-ын дэд дарга Б.Баярсайхан, ГХБГЗЗГ-ын Барилга, нийтийн аж ахуйн албаны дарга Д.Гантулга,тус газрын ГЗБ-ын хэлтсийн дарга Ж.Даваабаатар, ТНС-ын төлөөлөгчид болон Дорнод, Хэнтий, Дундговь, Өмнөговь, Дорноговь, Говьсүмбэр Сүхбаатар гэсэн зүүн бүсийн долоон аймгийн ГХБХБГ-ын ажилтан албан хаагчид оролцлоо.
Энэ удаагийн арга хэмжээгээр сургалт семинар зохион байгуулсан нь “8 дахь удаагийн Зүүн бүсийн ГХБХБГ-ын чуулга уулзалт”-ын гол онцлог болсон бөгөөд сургалтаар ЗТБХБЯ-ны Хот байгуулалт, газрын харилцааны бодлогын газрын орлогч дарга Д.Мөнхбаатар: “Газрын тухай багц хуулиудын төсөлтэй холбоотой санал асуулга” хэлэлцүүлж, ГХБГЗЗГ-ын дэд дарга Б.Баярсайхан: “ГХБГЗЗГ-ын мэдээлэл”, олон улсын ТНС-ийн Монгол дахь төлөөлөгчийн газрын захирал Д.Галбадрах, мэргэжилтэн Э.Төгөлдөр нар “Экологийн бүс нутгийн үнэлгээний үр дүн”-г танилцуулах зэрэг сэдэвт лекцүүдийг тавьлаа.
Үүний дараа аймгууд өнгөрсөн жил хийж хэрэгжүүлсэн болон хийхээр төлөвлөж буй ажлын талаар товч мэдээлэл хийн, салбарын өмнө тулгамдаж буй асуудлууд, түүнийг хэрэгжүүлэх арга замуудыг хэлэлцэж байсан бөгөөд барилга, газрын чиглэлээр салбар хуралдаан зохион байгуулж харилцан туршлага солилцож байсан нь маш үр дүнтэй болж байлаа. Мөн газрын албан хаагчид хоорондоо танилцаж нөхөрлөхийн зэрэгцээ урлаг соёл, спортын арга хэмжээнүүд зохиогдсоны дотор сумо бөхийн тэмцээн хамгийн сонирхолтой нь боллоо.