Нийслэлийн агаарын бохирдлыг бууруулах хязгаарлалтын бүс дэхь иргэн, аж ахуйн нэгж байгууллагын дагаж мөрдөх журмын төслийн танилцуулгыг Агаарын чанарын албаны дарга Л.Мөнхцог Засаг даргын зөвлөлийн хурал дээр хийлээ.  Зургаан  заалт бүхий шийдвэрийн төсөл дээр зөвлөлийн гишүүд саналаа хэлэв. Ирэх өвөл Улаанбаатар хотод хязгаарлалтын нэгдүгээр бүсэд багтсан 11 мянган өрх зөвхөн хагас кокс болон үртсэн шахмал түлш л түлнэ.  Энэ ажлыг дүүрэг, хороо, хэсгийн ахлагч нараар дамжуулан хийх учиртайг Хотын дарга зөвлөлийн хурал дээр онцоллоо. Цэвэр агаар сангаас 459 хэсгийн ахлагч нарыг сард 50 мянган төгрөгийн урамшуулалтайгаар утааны байцаагчийн ажилд дайчлах юм.

        Журам мөрдөгдсанөөр хязгаарлалтын нэгдүгээр бүсэд хамрах айлууд түүхий нүүрс, бусад утаа үйлдвэрлэгч түлшнээс татгалзах ёстой. Хэрвээ журмыг дагаж мөрдөхгүй бол нүүлгэн шилжүүлэх хүртэл арга хэмжээ авахыг тусгаж өгчээ. Түүнчлэн хотын төвд барилга барьж буй компаниуд өвлийн улиралд хашаандаа гэр барьж түүхий нүүрс түлдэг. Энэ байдлыг ч таслан зогсоохоор журамд тусгаж өгчээ.  Уг асуудалтай холбогдуулж хэд хэдэн гишүүд саналаа хэлэв. Нийслэлийн Засаг дарга Г. Мөнхбаяр журмыг зарчмын хувьд дэмжинэ гээд 6,7,8 дугаар сарууд энэ сэдвээр түлхүү ажиллах сар байхыг анхаарууллаа. Ерөнхийлөгчийн зүгээс бодлого гаргаж, хууль баталж бүтэц, хамрагдах хүрээ, зарцуулах хөрөнгийг шийдвэрлэсэн энэ ажлыг одоо орон нутаг хэрэгжүүлэх үлдэж байна. Хэн нэгэн лүүгээ түлхэх ямарч арга зам байхгүй. Иргэд тэр тусмаа хязгаарлалтын бүс дэхьайлуудад ирэх өвөл та нүүрс түлэхгүй шүү гэдгийг ойлгуулах ажил үлдэж байна.

       Энэ ажлыг  энэ зун хийх учиртайг сануулаад хийж буй ажилдаа нягт нямбай хандахыг анхаарууллаа. Засаг даргын зөвлөлийн хурлаар дэмжигдсэн уг журмыг ирэх долоо хоногт болох НИТХ-ын тэргүүлэгчдийн хуралдаанаар хэлэлцүүлнэ. Энэ асуудлын дараа гэр хорооллыг орон сууцжуулах төслийн нэгжийн боловсруулсан  нийслэлийн гэр хорооллын газрыг чөлөөлөх, орон сууцжуулах ажлыг зохион байгуулах журмыг хэлэлцэх байлаа. Гэхдээ анхаарал татсан энэ асуудлыг сайтар боловсруулж чамбайруулах үүднээс ажлын хэсэг гаргаж дахин хэлэлцэхээр болов. Ингэж байж тэргүүлэгчдийн хуралд оруулахаар тогтлоо.