Өдгөөгөөс 50 жилийн тэртээ энэ өдөр Монгол Улсад анхны барилгын инженер мэргэжлээр 23 хүн төгсөж боловсролын дипломоо гардан авч байсан түүхэн өдөр юм.
            Тухайн үеийн МУИС-ийн Математикийн ангийн оюутнуудаас сонголт хийж барилгын инженер мэргэжил эзэмшүүлэхээр анх зохион байгуулсан нь монгол улс дотооддоо үндэсний барилгын инженер бэлтгэх эхлэл болжээ.
           Барилгын салбарын хэрэгцээ шаардлагыг харгалзан эдгээр залуу инженерүүдийг ажилд хувирлажээ. Тухайлбал Сүхбаатарын нэрэмжит стипендтэй Гончигийн Базар, ангийн ахлагч Лувсандагвын Бадгай нарыг их сургуульд багшаар, Цэсэнгийн Балжинням, Анхын Гомбо хоёрыг Улсын Барилгын хороо, ББМҮЯ-ны төв аппратад тус тус ажиллуулжээ.
             Түүнчлэн Гарамжавын Цэдэвийг хотын барилгын трестийн ерөнхий инженерээр, Хуалангаагийн Нямааренчин Дөчин мянгатын барилга трестийн ерөнхий инженерээр, Даньдын Батсүхийг дөнгөж шавыг нь тавиад байгаа Дархан хотын барилга конторын ерөнхий инженерээр тус тус тохоон томилжээ. Бусад залуучуудыг барилгын зураг төсөл зохиох ба барилгын үйлдвэрлэлд хуваарьлаж байжээ.
            Тавин жилийн тэртээ ажлын гараагаа эхэлж байсан анхны инженерүүд маань их бүтээн байгуулалтад өөрийн хувь нэмрээ оруулан, хойч үеээ сурган хүмүүжүүлсэээр ирсэн юм. Тэдний хийсэн бүхнийг тоолохоос илүүтэй хийгээгүй үлдсэнийг нь тоолсон нь илүү дөхөмтэй цөөн тоо гарах буй за.
             Улирах цагийн уртад анхны 23 инженерүүдээс эдүгээ далан насны босгыг аль хэдийнэ давсан 11 инженер /Д.Арсланбаатар, Г.Базар, Л.Бадгай, А.Гомбо, О.Жадамбаа, Ж.Зухаа, В.Игнатьев, Л.Мангал, Б.Чимэддолгор, Д.Чулуунбат, Ч.Шуушингаа/ амьд сэрүүн байна.
            Иймд Барилгын салбарынхнаа төлөөлж “Барилга.МН” сэтгүүл болон www.barilga.mn сайтын хамт олноос анхны барилгын инженерүүддээ төгсөлтийн өдрийн баярын мэнд хүргэж амьдралд нь хамгийн сайн сайхан бүхнийг хүсэн урт насалж удаан жаргахын ерөөл өргөж байна.
             

           Барилга.МН сэтгүүл болон www.barilga.mn сайтын хамт олон   2011-06-17