2011 онд нийслэлийн Авто замын сүлжээг сайжруулах чиглэлээр таван эх үүсвэр бүхий 67 тэрбум төгрөгийн хөрөнгө оруулалтын ажлыг хэрэгжүүлэхээр болсон. Түүнчлэн энэ жил нийт 73 км зам шинээр баригдах төлөвлөгөөтэй байгаа бөгөөд энэ ондоо багтааж 61 км замын ажил хийхээр болсон юм.

Харин баяр наадмын өдрүүдэд зам засварын ажлыг түр зогсоож хөдөлгөөнийг саадгүй нэвтрүүлсэн. Тэгвэл өнөөдрийн байдлаар зам засварын ажил хэрхэн явагдаж байгаа талаар нийслэлийн Нийтийн тээврийн газрын дарга Д.Одоос тодруулсан юм.

-Баяр наадмын өдрүүдэд зам засварын ажил түр зогссон. Өнөөдрийн байдлаар энэ ажил хэдэн хувьтай байна вэ?
-Их засвар, шинэчлэлтийн ажлыг нийт дүнгээр нь авч үзвэл 40-50 хувьтай байна. Энэ хувь зам болгонд харилцан адилгүй байгаа. Зарим замын ажил дуусч ашиглалтад ороод байна.
-Өнөөдрийн байдлаар замын хөдөлгөөнийг хязгаарлан засварын ажил хийж байгаа хэдэн зам байна вэ?
-Өнөөдрийн байдлаар Нарны зам хаалттай байна. Өөрөөр хэлбэл, Чулуун-Овоо тал руу чиглэсэн хэсгийг хаасан. Уг замыг Зүүн уулын үерийн сувгийн хоёр шуудуу хөндлөн огтолж гарч байгаа. Замыг энэ сарын 15-нд хаасан. Харин 21-ний орчимд засварын ажлыг дуусгаж хөдөлгөөнийг нээх төлөвлөгөөтэй байна. Үүнээс гадна Бага тойруугийн замыг хаана. Мөн "Метромол" их дэлгүүрийн урд талын хэсэг хаалттай байгаа. Цаашид хуваарийн дагуу IV дэлгүүрийн уулзвараас зүүн тийш хэсэгчлэн хааж засварын ажил хийнэ.

-Наадмын өдрүүдэд нээсэн замуудад хагарал эвдрэл үүссэн. Үүнд хэрхэн хяналт тавьж байгаа вэ?
-Баяр наадмын өдрүүдэд иргэдийг шороогоор явуулахгүй үүднээс Таваншарын орчимд конденсаторыг зам доогуур оруулах тунелийн ажил хийсэн. Энэ ажлыг хийх явцад буюу энэ сарын 9-нд бороо орж суурь хөрс норсон. Нойтон суурин дээр түр асфальтан хучилт хийснээс эвдрэл гарсан байгаа. Харин энэ замыг дахин хуулж засварын ажлыг бүрэн хийнэ. Замын чанар дээр захиалагчийн зүгээс өдөр бүр хяналт тавьж байгаа. Мөн Мэргэжлийн хяналтын газраас хяналт тавьж байдаг.
-Үүнээс гадна Зүүн дөрвөн замаас Офицеруудын ордон хүрэх зам маш ихээр эвдэрсэн. Энэ замыг хэзээ засах вэ?
-Урсгал засварын ажил өргөтгөл шинэчлэл хийгдэхгүй замууд дээр төлөвлөгдсөн байгаа. Энэ замууд дээр бидний хэлдгээр нөхөөсийг хөдөлгөөний аюулгүй байдлыг хангах үүднээс хийж байгаа. Харин Зүүн дөрвөн замаас зүүн тийш Офицеруудын ордны чиглэлд байх гол гудамж замыг энэ жил бүрэн шинэчилнэ. Энэ жил бороо хур их орж байна. Урсгал засвар хийгдээгүй замууд дээр эвдрэл ихээр гарч байгаа учраас баярын өмнө ИТХ-ын шийдвэрээр санхүү, хөрөнгийн асуудлуудыг шийдээд шууд гэрээгээр өргөтгөл шинэчлэлтийг хийхээр болсон. Энэ замын ажил удахгүй эхэлнэ.
-Зарим замын ажил хугацаандаа багтаж ашиглалтад орохгүй удаашралтай байгаа. Зам засварын ажил хэзээ дуусах вэ?
-Түлшний хомсдол болон хур борооноос үүдэн зарим замын ажил удаашралтай байгаа. Гэсэн ч бид цаашид төлөвлөсөн ажлаа хугацаанд нь хийж дуусгахаар ажиллаж байна.