Нийслэлийн Засаг даргын Тамгын газар, Нийтийн Тээврийн газраас Улаанбаатар хотын нийтийн тээврийн тулгамдсан асуудлыг шийдвэрлэхийн тулд шинэ дэвшилтэт тээврийн төрөл, метроны систем болон тусгай замын автобусны системийг хөгжүүлэх тухай танилцуулах уулзалыг 2011 оны 6-р сарын 28-ний өдөр “Хангарьд” ордонд зохион байгууллаа. Уулзалтад Нийслэлийн Засаг дарга бөгөөд Улаанбаатар хотын захирагч Г.Мөнхбаярын урилгаар УИХ-ын гишүүн С.Баяр, Д.Ганхуяг. Х.Тэмүүжин, Ч.Сайханбилэг, Д.Загджав, Ц.Баярсайхан, З.Алтай, Д.Очирбат болон долоон жилийн тэртээ метро байгуулах ажлыг санаачилж байсан Х.Ганхүү нар хүрэлцэн ирсэн. Энэ үеэр дөрвөн илтгэл тавигдсанаас “Улаанбаатар хотын нийтийн тээвэрт тусгай замын автобусны үйлчилгээ нэвтрүүлэх тухай”, “Улаанбаатар хотод метро барьж байгуулах ТЭЗҮ-ийн судалгаа”, “Нийслэл орчмын төмөр замын сүлжээний талаар” сэдэвт танилцуулга хийгдсэн бол Улаанбаатар хотын Ерөнхий архитектор бөгөөд Нийслэлийн Барилга, хот байгуулалт, төлөвлөлтийн газрын дарга Э.Хүрэлбаатар “Хот төлөвлөлтөнд орчин үеийн нийтийн тээврийг төлөвлөх нь” сэдэвт илтгэл тавьсан. Улаанбаатар сая гарсан хүн амтай олон улсын “Метрополис” хотын жишигт хүрсэн нийслэлийн хувьд мөн хотын нийтийн тээвэр, замын түгжрэл, агаарын бохирдол толгойны өвчин болоод байгаа өнөө үед асуудлыг шийдвэрлэх нэг арга зам нь Метротой болох явдал хэмээн тодорхойлж энэ уулзалтыг зохион байгуулсан. Эцэст нь судалгаа, шинжилгээ болон дүгнэлтүүдийг үндэслэн нийслэлийн нийтийн тээврийн шийдлийг хотын төмөр замын суурь бүтцийг ашиглан хөгжүүлэх боломжтой гэсэн дүгнэлтэд хүрсэн юм. Төслийн хүрээнд эхний ээлжинд одоо нийслэл хотоор дайран өнгөрч буй гол шугамыг нийтийн тээвэрт ашиглах тогтсон цагаар явдаг тээврийн хэрэгсэл нэвтрүүлбэл зохимжтой. Хоёрдугаар ээлжинд хойд зүгээс буюу 7-н буудал болон Баянхошуу, Баруун ба зүүн салаа чиглэлээс хотын төв рүү чиглэсэн шугамуудыг санал болгосон. Хотын мээр уулзалтын үеэр эцсийн дүндээ хотын иргэдийн аюулгүй ая тухтай амьдрах орчин бүрдүүлэх нь чухал. Дээрх дөрвөн төслийг нэгтгэн ТЭЗҮ боловсруулж энэ намар чуулганд оруулж хэлэлцүүлэхээр бид ажиллах болно. Нийслэлээс сонгогдсон эрхэм гишүүд та бүхэн Улаанбаатарынхаа хөгжлийн төлөө дэмжин ажиллахыг хүсэж байгаагаа илэрхийлсэн. Нийслэлийн тойргоос сонгогдсон УИХ-ын гишүүд нийслэлээ хөгжүүлэхээр нэгдэн ажлын хэсэг байгуулж, олон нийтэд зориулагдах зорчигч тээврийн асуудлыг “улс төржихгүй” шийдвэрлэн, үр дүнд хүргэхийн тулд бие даан нэр дэвшигч З.Алтай гишүүнийг ажлын хэсгийг ахлах санал дэвшүүлсэн.