Барилгын салбарын удирдах ажилтаны зөвлөгөөн нь барилгын салбарынхан өөрсдийн хийж байгаа үйл ажиллагаандаа үнэлэлт дүгнэлт өгч, алдаа оноогоо мэргэжил нэгтнүүдтэйгээ ярилцах, гарах арга замыг олох үүднээс жил бүр зохион байгуулсаар ирсэн билээ.

Энэ удаагийн барилгын салбарын удирдах ажилтны зөвлөгөөн бүтээн байгуулалтын түүхэн цаг үеийг зарлан тунхагласан мөн барилгын салбар үүсч хөгжсөний 85 жилийн ойтой давхцаж байгаагаараа онцлог болж өнгөрлөө. Удирдах ажилтны зөвлөгөөнийг ГХБГЗЗГ-ын дарга Ц. Ганхүү нээж ирсэн зочдыг танилцуулсанаар эхэлсэн юм. Үүний дараа ЗТБХБЯ-ны сайд Х. Баттулга 2010 онд барилгын салбарт хийгдсэн ажлын үр дүн болон одоо хийгдэж байгаа ажлууд, барилгын салбарт ажиллах мэргэжилтэй ажилтны талаарх мэдээллийг итгэлдээ дурьдлаа. Дараагийн илтгэл тайланг УИХ-ын гишүүн Ж. Батсуурь Шинэ бүтээн байгуулалттай холбоотой УИХ-аас ямар гаргасан хууль тогтоомжид ямар өөрчлөлт оруулж байгаа талаар товчхон мэдээлэл хийгээд барилгачдаа шинэ бүтээн байгуулалтандаа ханцуй шамлан эрч хүчтэй орохыг уриаллаа.

    

      Дараа нь Нийслэлийн Засаг дарга бөгөөд Улаанбаатар хотын захирагч Г. Мөнхбаяр “Шинэ бүтээн байгуулалт дунд хугацааны зорилтот хөтөлбөрийг хэрэгжүүлэхэд нийслэлийн оролцоо” сэдвээр мэдээлэл хийлээ. Саяхан Монгол л хүн амын тооллогоо хийж дууссан бөгөөд Улаанбаатар хотод урьдчилсан байдлаар 1 сая 153 мянган хүн амьдарч байгаагаас 62% нь гэр хороололд амьдарч байна гэсэн стастик тоо баримт гарчээ. Харин 10 жилийн өмнө 2000 онд Улаанбаатар хотод 774 мянган хүн амьдардаг байсан бөгөөд үүний 51% нь орон сууцанд байдаг гэсэн судалгаа гарчээ. Үүнээс үзэхэд Улаанбаатар хотыг барилгын салбарыг эрчимтэй хөгжүүлэх үүнд барилгын компаниудын оролцоо маш чухал үүрэг гүйцэтгэх хэрэгтэй байгааг мэдээлэлдээ дурьдлаа. Гэр хороололыг орон сууцжуулах ажилд багагүй бэрхшээл тулгарч байгаагын зэрэгцээ Улаанбаатар хотод баригдаж байгаа барилгын чанар дээр анхаарах цаг болсоныг сануулаад Хот төлөвлөлтийн газар болон МБХ-той хамтран мэргэжлийн баг гарган ажиллаж байна. Энэ баг нь баригдаж байгаа барилгуудад газар хөдлөлтийн шинжилгээг хийх болно. Мөн дотоодын барилгын үйлдвэрүүдээ түшиглэн зам засварын ажил хийж байгааг мэдэгдээд удирдах ажилтны зөвлөгөөнд амжилт хүслээ.

    

     Мөн Засгийн газраас санаачлан хэрэгжүүлж байгаа “Шинэ бүтээн байгуулалт” дунд хугацааны зорилтот хөтөлбөр болон “100 мянган айлын орон сууц” төслийг хэрхэн хэрэгжүүлэх, үндэсний барилгын компаниудыг хэрхэн хамруулах талаар хэлэлцэн МБХ-оос гаргасан 10- тийн системээр жижиг аж ахуйн нэгжүүдийг нэгтгэн их бүтээн байгуулалтанд гар бие оролцуулахаар шийдвэр гарган ЗТБХБЯ-ны сайд Х. Баттулга, МБХ-ны ерөнхийлөгч М. Батбаатар нар хамтын ажиллагааны гэрээнд гарын үсэг зурсан нь чухал ач холбогдолтой үйл явдал болж өнгөрлөө. Энэхүү хамтын ажиллагаан нь барилгын салбарын жижиг аж ахуйн нэгжүүдийг дэмжих, улс орон даяар их бүтээн байгуулалт өрнөх, монгол барилгачид гадныхны тусламжгүй өөрсдөө бүтээн босгож чадна гэдгийг батлах баталгаа болно гэж үзэж байгаа юм.

Хамтын ажиллагааны гэрээнд гарын үсэн зурсаны дараа ГХГЗЗГ-ын дарга Ц. Ганхүү “2010 оны удирдах ажилтны зөвлөгөөний төлөвлөгөө биелэлт”-ийг танилцуулсан юм. Өнгөрсөн 2010 оны БУАЗ- өөс 21 заалт бүхий шийдвэр гарсан бөгөөд шийдвэрийг хэрэгжүүлэхээр салбарын төрийн болон төрийн бус байгууллагууд зөвшилцөн 46 заалт бүхий хэрэгжүүлэх ажлын төлөвлөгөө гарган ажилласанаас 86,8% -ийн биелэлттэй гарсан байна. Тавьсан зорилтын хүрээнд Утаагүй Улаанбаатар, 100 мянган айлын орон сууц хөтөлбөр, Сум дундын бичил төсөл зэргийг нэгтгэн Шинэ бүтээн байгуулалт хөтөлбөр болгон хэрэгжүүлж байна. Үндсэндээ 2010 оны УАЗ-өөс гарсан шийдвэрийн биелэлт сайн гэж дүгнэлээ.

 

     Төрийн байгууллагуудын төлөөлөл мэдээлэл хийсэний дараа салбарын төрийн бус байгууллагуудын төлөөлөл Шинэ бүтээн байгуулалтын талаар санал бодлоо илэрхийллээ. МБХ-ны ерөнхийлөгч М. Батбаатар “Шинэ бүтээн байгуулалт” дунд хугацааны зорилтот хөтөлбөрт барилгын төрийн бус байгууллагууд ба барилгын салбарын байгууллагуудын оролцоо сэдвээр, МБҮА- ийн гүйцэтгэх захирал Ц. Эрдэнэбаяр “Их бүтээн байгуулалтанд барилгын компаниудын оролцоо”, БМҮХ-ны ерөнхий менежер Н. Оч “Шинэ бүтээн байгуулалтын үйл хэрэгт БМҮ-үүдийн гүйцэтгэх үүрэг” сэдвээр санал бодол, шүүмжлэлээ хэллээ.

      БЗТЗХ-ны тэргүүн Г. Мягмар “Бүтээн байгуулалтанд барилгын зураг төслийн байгууллагын үүрэг” сэдвээр санал бодлоо илэрхийлсэний дараа Барилгын үнэ, төсөв бүрдэлтийн холбооны тэргүүн Д. Санж “Барилгын төсөв, үнэ бүрдэлтийн асуудлыг олон улсын стандартын дагуу шинэчлэж буй мэдээлэл” сэдвээр мэдээлэл хийлээ.

     Зөвлөгөөнд оролцож байгаа төрийн бус байгууллагууд болон барилгын салбарын компаниудын төлөөлөлүүдийн хэлсэн үгнээс харахад “Шинэ бүтээн байгуулалт”-нд шүүмжлэлтэй хандах, анхаарах асуудлууд нилээдгүй байгаа нь анзаарагдсан юм. Төрийн байгууллагын шийдвэр гаргах түвшний хүмүүс барилгын салбарын хөгжилд хамгийн чухал үүрэг гүйцэтгэн оролцох хүмүүсийн үгийг сонсож, хийж байгаа үйл ажиллагаандаа үнэлэлт дүгнэлт хийлгэж сурмаар санагдсан. Өөрсдийн хийсэн ажлынхаа товчхон тайланг тавьчихаад гараад явах биш жилдээ ганц зохиогддог энэ уулзалтандаа ач холбогдол өгч, мөн зохион байгуулалт талаасаа ч анхаарах болсоныг зөвлөгөөнд оролцогчид хэлж байлаа.