Нийт 50 хорооны 100,0 өрх айл  ирэх жил түүхий нүүрс түлэхгүй байх учиртай.  Баянгол дүүрэгт 7 хорооны 10 мянга гаруй өрх, Чингэлтэй, Сүхбаатар дүүрэгт 11 мянган өрхийг түүхий нүүрс огт түлүүлэхгүй байх юм. Цаашилбал утаа бага ялгаруулдаг зуухыг нийслэлийн 6 дүүргийн 34 хорооны 70 мянган айлд тарааж байж утаатай тэмцэнэ.  Энэ ажилтай холбоотой бэлтгэл ажил хийгдэж байна.  Юун түрүүнд үртсэн болон коксон түлшний нөөц базаах,  шахмал түлшний стандарт батлах, айл өрх албан байгуулагуудын дагаж мөрдөх журмыг батлах , боловсруулсан түлшээ хадгалах агуулах нөөцийг бүрдүүлэх талаар ажиллаж байна. Түүнчлэн хязгаарлалтын бүсэд 1000 орчим өрхийг цахилгаанаар халаагуураар хангах тендер зарласан байгаа. Утаатай тэмцэх ажлын хүрээнд бид дээрхи ажлыг хийж байна. Үүнээс гадна гэр хорооллын нойлыг ариутгах ажил хавар, намар 2 удаа хийгдэнэ. 170 мянган жорлон хотод бий. Айл нэг бүрийг алгасахгүйгээр био идэвхт бодисыг нойлуудад нь цацах ажил эхэлж байна гэв.
НЗДТГ-ын Нийгмийн хөгжлийн хэлтсийн дарга М. Отгонбаяр:
Нийслэлийн Засаг даргын зөвлөлийн хурал дээр Хөдөлмөр эрхлэлт, хүний хөгжлийг дэмжих жилийн  1–р улирлын тайланг хэлэлцсэн.  Эндээс гарсан дүгнэлт гэвэл ажил эрчимжүүлэх шаардлагатай байна. Өөрөөр хэлбэл бодитой ажлын байр харагдахгүй байна. Орон сууц нийтийн аж ахуйн газар 47 иргэнийг нэг сар ажлын байраар хангаж дагалдан хийлгээд улмаар бүрмөсөн ажлын байртай болгосноос өөр гавьтай мэдээлэл алга. Энэ жил тендерт шалгарч ажил авсан аж ахуй нэгж байгуулагуудад ажлын байр гарга гэсэн шаардлага тавьсан ч биелүүлсэн нь ховор байна.
Улаанбаатар хотын ерөнхий менежер Ч. Бат:
Монгол Улсын Ерөнхийлөгчийн зарлигийн дагуу өнгөрсөн бямба гарагт бүх нийтээр мод тарих арга хэмжээ боллоо. Энэ жил 21 мянган иргэн мод тарих ажилд гар бие оролцож 63800 мод бут сөөг суулгасан. Энэ тоог  өнгөрсөн жилийнхтэй харьцуулахад бага тоо. Гэвч бид тооны хойноос хөөцөлдөх биш чанарыг эрхэмлэж байна.  Ирэх намар тарьсан мод, бут сөөг хир ургаж вэ гэдэг энэ ажлын үр дүн байх юм. Тиймээс мод суулгаад орхих биш тарьсан модоо арчлахыг иргэд, аж ахуй нэгжээс бид хүсэж анхааруулж байна. Урин дулаан ирж байгаа учраас хотод 23 усан оргилуурыг ажиллуулж эхэлсэн.  Хувийн хэвшлийнхэн усан оргилуураа ажиллуулаагүй байгаа. Өнгөрсөн долоо хоногийн сүүлчээс шөнөдөө нэмэх градустай хонож  эхэлсэн болохоор тэдэнд усан оргилуураа ажиллуулах үүрэг даалгавар өгнө.  Өмнөх шуурхай хуралдаан дээр 56 траншейны таг алга болсон тухай мэдээлэл өгч байсан. Тэгвэл өнгөрсөн 14 хоногт 45 ыг нь тагтай болгож, одоо онгорхой 11 таг үлдсэн.  Баянзүрх, Сүхбаатар,  Баянгол дүүргийн удирдлагууд энэ асуудлыг анхаарч холбогдох байгуулагуудтай хариуцлага тооцох шаардлагатай байна.
Нийслэлийн Засаг дарга бөгөөд Улаанбаатар хотын Захирагч Г. Мөнхбаяр:
Онгорхой байгаа траншейны асуудалд эрчим хүчний хуулийн дагуу арга хэмжээ ав. Нийтийн эзэмшлийн гудамж талбайг усалгаажуулах асуудалд дүүргийн удирдлагууд анхаарлаа хандуул. Тухайлбал Баянгол дүүрэг дээр гэхэд ногоон байгууламжаа бус замын хоёр талын асфальтаа услаад яваа харагдана лээ. Усныхаа даралтыг тааруулах хэрэгтэй.  Хөдөлмөр эрхлэлт хүний хөгжлийг дэмжих жилийн ажлыг анхаарлынхаа төвд авахыг дүүргийн дарга нарт анхааруулмаар байна. Өнөөдөр хаана ажилгүй иргэд байна. Дүүрэг, хороонд байна.  Хөдөлмөр эрхлэлтийг дэмжих санг хариуцаж буй Хөдөлмөр эрхлэлтийн газрын дарга н. Баярсайханы өрөөний үүдэнд дүүргийн удирдлагууд өнөөдрөөс эхлээд ээлжлээд суу. Тэр санд 20-оод тэрбум төгрөг байгаа юм билээ. Төсөл хөтөлбөрөө бариад ажилгүй иргэдээ ажилтай болгоё гээд яваад бай. Би та нарт ийм л үг хэлнэ. Орлогч дарга Д. Ганболдын мэдээлэлтэй холбогдуулаад хэлэхэд нийслэлийн удирдлагууд,  ажил хариуцсан хүмүүс ирэх 6 сард гэр хороололд ажиллана. Ингэхдээ ирэх өвөл түүхий нүүрс түлэхгүй байх асуудлыг ярина. Иргэд та бидний хийж байгаа энэ ажлын талаар зөв мэдээлэлтэй байх ёстой. Өнгөрсөн жилүүдэд утааны асуудал урсгалаар явсан. Харин энэ жил тийм юм байхгүй шүү гэж анхаарууллаа. Ингээд Хан-Уул дүүргийн Засаг дарга Ж. Ганхуягаас 120 мянгат дахь  “Алтай констракшн”-тай холбоотой газрын асуудлыг хэрхэн шийдвэрлэснийг танилцуулахыг хүсэв.
Хан-Уул дүүргийн Засаг дарга Ж. Ганхуяг:
“Алтай констракшн” компаний хашаа тойруулан хатгасан  газрын хэмжээ  9000 м кв.  Энэ газарт голдоо усан хөшиг бүхий  усан оргилууртай ногоон байгууламж барихаар болсон.  Хүүхэд залуучуудад зориулж гадна талдаа роликийн замтай иж бүрэн амралт чөлөөт цагийн цогцолбор байгуулахаар зураг төсвийг гаргасан. Энэ ажил ирэх 7 дугаар сараас эхэлнэ хэмээн дүүргийн засаг дарга нар нь танилцууллаа. Өнөөдрийн шуурхай хуралдаанаас эхлээд хотын 9 дүүрэгт хийгдэх бүтээн байгуулалт, тохижилтын ажлын талаархи мэдээллийг засаг дарга нар нь өгч байх юм. Хотын баруун дүүрэг Сонгинохайрхан хийх ажлаа тайлагнаж байна.
Сонгинохайрхан дүүргийн Засаг дарга Ц. Болд:
Манай дүүрэгт энэ жил бүтээн байгуулалт, тохижилтын ажлын хүрээнд томоохон ажлууд хийгдэхээр зураг төлөвлөгөө нь гараад байна.  Улс, нийслэлийн төсвөөр нийт 113 ажил хийгдэхээс Саппора, Цамбагарав, Хархорин төв дээр усан оргилуур, ногоон байгууламж бүхий амралт чөлөөт цагийн талбайтай болгох гэж буй нь иргэдийн зүгээс талархал хүлээж байна.  Эдгээр ажилд тус бүр 100 сая төгрөг зарцуулна. Түүнчлэн Москвагийн гудамж Дүүргийн өндөрлөг орчимд гэрэлтүүлэг, ногоон байгууламжийн ажил хийгдэнэ. Орон сууцны хорооллын дотор 5 байршилд хүүхдийн тоглоомын болон чийрэгжүүлэлтийн талбайтай  бичил тохижилт хийнэ. Гэр хорооллын 4 байршилд ч мөн адил дээрхи ажлыг хийхээр болсон. Энэ жил хийгдэх ажлуудаас 5 ажилд нээлттэй тендер зарласан. 5 сарын 20 нд нээх юм. 12 ажлын зураг төсөв бүрэн гарч тендер зарлах шатандаа, зураг төсвөө хийх  шатандаа явж байгаа 17 ажил байна. Хотын баруун дүүрэг Сонгинохайрхан хүн ам ихтэй. Тэр хирээрээ хийх ажил олонтой байдаг. Өнгөрсөн жилүүдэд бүтээн байгуулалт, тохижилтын ажил хаягдаж ирсэн манай дүүрэгт хотын өнөөгийн удирдлага анхаарлаа хандуулж иргэдийн төлөө энэ ажлуудыг хийх гэж буйд Сонгинохайрханчууд сэтгэл дүүрэн байгаа.