Улаанбаатар хот болон төвийн бүсийн эрчим хүчний системийн өсөн нэмэгдэж буй цахилгаан хангамжийг дээшлүүлэх шаардлага зүй ёсоор тулгараад байгаа. Тэгвэл энэхүү цахилгаан болон дулааны хэрэгцээг хангах эрчим хүчний шинэ эх үүсвэрийг “ДЦС-3” ХК-ийг түшиглэн барихаар болж байгаагаа Эрдэс баялаг, эрчим хүчний сайд Д.Зоригт өнөөдөр газар дээр нь ажиллах үеэрээ мэдэгдлээ. Улаанбаатар хотын тавдугаар дулааны цахилгааны станц нь эрчим хүчний хөгжлийн шинэ үе шатанд хийх бүтээн байгуулалтын  эхлэл болж байгааг салбарынхан онцолж байна.

 “Улаанбаатарын ДЦС-5” төслийн техникийн судалгааг Азийн хөгжлийн банкны техникийн тусламжаар хийж дуусгаад Эрдэс баялаг, эрчим хүчний яамнаас Засгийн газрын хуралдаанаар хэлэлцүүлэн ҮАБЗ-д оруулахаар бэлтгэл ажлыг хангаж байгаа аж. 

Энэхүү техникийн судалгаагаар Улаанбаатарын хэрэглэгчдийн цахилгаан дулааны хэрэглээний төлөвийг судалсны үндсэн дээр шинээр баригдах эх үүсвэрийн хүчин чадал, технологи, байршлыг тодорхойлж, байгаль орчны болон нийгэм эдийн засгийн үнэлгээг хийж, “Улаанбаатарын ДЦС-5”-ыг барих ашиглах ажилд хувийн салбарын хөрөнгө оруулалтыг татан оролцуулах зорилгоор төр хувийн хэвшлийн түншлэлийн хэлбэрүүдийг ашиглах бололцоог ч судалжээ. 

Шинээр баригдах 820 МВт хүчин чадалтай 5-р цахилгаан станц нь техник технологи, хүчин чадлын үзүүлэлтүүд, хөрөнгө оруулалтын хэлбэр хэмжээ, байгаль орчинд ээлтэй байдал, салбарт эзлэх байр суурь зэрэг олон үзүүлэлтээрээ орчин үеийн технологийг ашиглах юм байна.

Эрчим хүчний салбарын орлогын нийт дүн өнгөрсөн онд 280,5 тэрбум төгрөг болж, өглөг 29,3 тэрбум төгрөгөөр буурсан нь эдийн засгийн хувьд сайн үзүүлэлт болсныг сайд салбарынхандаа дуулгаж байлаа.

Цаашид Дархан, Сэлэнгэ, Эрдэнэтийн районд зэс хайлуулах үйлдвэр барих, “Шинэ бүтээн байгуулалт” хөтөлбөр болон гэр хорооллын халаалт, Чойр, Сайншанд зэрэг аж үйлдвэрийн паркуудад шаардлагатай хүчин чадлыг тоймоор тооцоолоход 2012-2030 он гэхэд зөвхөн Төвийн эрчим хүчний системийн хувьд  3000 орчим мВт-ын нэмэлт хэрэгцээ үүсэх төлөвтэй байна. Тиймээс эрчим хүчний шинэ эх үүсвэрийг барьж байгуулах эдийн засгийн боломжийг бүрдүүлэх, салбарыг зах зээлийн харилцаанд шилжүүлэх шаардлагаас гадна энэ салбарт хөрөнгө оруулах хувийн хэвшлийнхэнд эрхзүйг орчинг бүрдүүлэх шаардлагатай байгааг ЭБЭХЯ-ны Эрчим хүчний бодлогын газрын дарга Т.Цэрэнпүрэв танилцуулга хийхдээ онцоллоо.

Тавдугаар цахилгаан станцын явцыг танилцуулах уг уулзалтад салбарын мэргэжилтнүүд, эрчим хүчний үйлдвэр, компаниудын захирал, ерөнхий инженерүүд мөн оролцлоо.