Улаанбаатар хот дахь нийтийн зориулалттай орон сууцуудыг паспортжуулах ажлыг нийслэл анх удаа хэрэгжүүлэх гэж байна. Эхний ээлжинд 20 барилгад паспортжуулалт хийхээр төлөвлөжээ. Нийслэлд анх удаа хийх гэж буй энэ ажлыг эхлүүлэхийн тулд тодорхой үе шаттай ажил явуулсан гэж Хотын дарга Г.Мөнхбаяр хэлж байна.

Нийслэлийн барилга хот төлөвлөлтийн газрын дэргэд барилгын чанар, аюулгүй байдлын хэлтсийг цоо шинээр байгуулж нэн шаардлагатай зориулалтын багаж, тоног төхөөрөмжөөр хангажээ.

Тухайн барилга газар хөдлөлтөнд хэр тэсвэртэй вэ гэдгийг цууралт ч өгөхгүйгээр баталж өгөх төхөөрөмжийнхөө ид шидийг мэргэжилтнүүд өнөөдрөөс эхлэн шалгана. Нийтийн зориулалттай орон сууцыг газар хөдлөлтийн тэсвэрлэлтээр нь пастортжуулах ажлыг Нийслэлийн барилга хот төлөвлөлтийн газар Сууц өмчлөгчдийн холбооны дээд зөвлөлтэй хамтран зохион байгуулах юм байна.

Ажил эхлэхээс өмнө оршин суугчдад мэдээлэл өгөх зорилгоор 1961 оноос өмнө, 1961-1973, 1974-1987, 1988-2000, 2000 оноос хойш баригдсан орон сууцны СӨХ-ны 278 удирдлагатай уулзаж уг ажлынхаа утга учрын талаар танилцуулжээ.

Газар хөдлөлтийн тэсвэрлэлтийг шалгах ажил нэг барилга дээр 16-21 хоногт багтан дуусна. Энэ хугацаанд тодорхой бичилт хийгдэж дүгнэлт гарна гэж мэргэжлийн хүмүүс хэлэв. Улаанбаатар хотын Захирагч Г.Мөнхбаяр “Монгол Улсын Ерөнхийлөгч Үндэсний аюулгүй байдлын зөвлөлийн хурал дээр тодорхой асуудал хөндөн тавьж буй нэг нь нийслэл дэхь барилга байгууламжуудын газар хөдлөлтийн тэсвэрлэлтийг тогтоох энэ ажил байгаа юм.

Чин үнэндээ Улаанбаатар хотод өнөөдрийг хүртэл энэ ажил огт хийгдэж байгаагүй юм. Иргэд дам сургаар л энэ байшин газар хөдөлвөл нурах юм гэнэ лээ гэж өөр зуураа ярилцдаг. Тэгвэл одооноос эхлэн барилга байшингуудыг зориулалтын тоног төхөөрөмжөөр шалгаж, газар хөдлөлтөнд тэсвэрлэх чадварыг үнэлэх юм. Өнөөдөр дэлхий нийтийг сандаргаж буй гол аюул газар хөдлөлт болчихоод байна. Хэлж ирэхгүй энэ аюулын өмнө бэлтгэлтэй байхад энэ ажил нэн тустай.

Ажил эхлэхийн өмнө иргэд, оршин суугч нарт зөв зүйтэй ойлголт өгөх нь маш чухал. Эхний удаад газар хөдлөлтийн үед нурж мэдэх барилгуудыг сонгосон байгаа. Цаашид оршин суугч бүр байшингийнхаа чанар чансааг мэдэж байх нь амь нас, эд хөрөнгө гээд бүхий л зүйлд нь хамаатай” гэв.

Ийнхүү Улаанбаатар хот дахь барилга байшингуудыг паспортжуулснаар газар хөдлөлтийн гамшгаас урьдчилан сэргийлэхийн зэрэгцээ, ашиглагдаж байгаа барилга байгууламжийн хийц, бүтээцийг хүчитгэх, шаардлага хангахгүй бол буулгах улмаар зориулалтыг өөрчлөх замаар эвдрэл, нуралтаас үүсэх хохирлыг багасгах юм байна.