Монгол улсын хэмжээнд хэрэгжихээр төлөвлөгдсөн “Шинэ бүтээн байгуулалт” дунд хугацааны зорилтот хөтөлбөрийн хэрэгжих гол түлхүүр болсон Хөгжлийн банк  нээлтээ хийлээ.

Хөгжлийн банкны нээлтэнд Монгол Улсын Ерөнхий сайд С.Батболд, Сангийн сайд С.Баярцогт, Монгол Банкны ерөнхийлөгч  Л.Пүрэвдорж болон Үндэсний хөгжил, шинэтгэл хорооны дарга Ч.Хашчулуун нар оролцлоо.

Нээлтийн ажиллагааны үеэр МУ-ын Ерөнхий сайд С.Батболд “Хөгжлийн банкаар дамжуулж бид шинэ бүтээн байгуулалтын үндэсний томоохон хөтөлбөрүүдээ санхүүжүүлэн хэрэгжүүлнэ. Засгийн газраас 800 тэрбум төгрөгийн бондыг баталгаа болгосон. Монгол Улсын Засгийн Газар, Монгол Улсын Төв банкнаас бүх төрлийн дэмжлэг үзүүлж ажиллана гэдгийг Хөгжлийн Банкныханд хэлье. Гэвч бид дэмжлэг үзүүлэхийн зэрэгцээ өндөр шаардлага тавина, үр дүн хүлээнэ. Монгол Улс эдийн засгийн үсрэнгүй хөгжлийнхөө өмнө ирээд байна гэдэг нь энгийн яриа биш. Тийм бодит нөхуөл боломж бүрдээд байна. Тиймээс Хөгжлийн банкыг хүчтэй шуурхай ажиллахыг Монгол Улсын Засгийн Газраас үүрэг болгож  байна. Хөгжлийн банкны хамт олондоо ажлын амжилт хүсье” гэлээ.

Төрийн өмчийн хорооноос зарласан Хөгжлийн банкны удирдлагын багийг сонгон шалгаруулах олон улсын тендерт БНСУ-ын Хөгжлийн банк шалгарсан. Тус банктай хийсэн Гүйцэтгэх удирдлагын гэрээ хэлэлцээрийг ойрын хугацаанд дуусгавар болгохоор МУ-ын Хөгжлийн банкны төлөөлөн удирдах зөвлөл ажиллаж байгаа аж.

Гүйцэтгэх удирдлагын бүрэлдэхүүний 50-иас доошгүй хувь нь МУ-ын иргэн байхаар хуульчилсан бөгөөд одоогоор 4 хүн удирдлагын бүрэлдэхүүнд ажиллаж байгаа аж. Манай улсыг төлөөлж тэргүүн дэд захирлаар хатагтай Л.Болормаа томилогджээ.

Хөгжлийн банк эхний ээлжинд дөрвөн том төсөл хөтөлбөрийг санхүүжүүлэхээр УИХ-аас тогтоол гаргасан. Үүний дагуу Шинэ бүтээн байгуулалт буюу 100 мянган айлын орон сууц, Сайншанд дах Аж үйлдвэрийн парк, 1100 км төмөр зам болон 2008 онд батлагдсан авто замын болон эрчим хүчний шугамын ажил гэсэн дөрвөн үндсэн төсөл хөтөлбөр багтаж байгаа юм.

Дээрхи төсөл хөтөлбөрийг хэрэгжүүлэхтэй холбогдсон 800 тэрбум төгрөгийн өрийн бичгийг дотоодод арилжаалахыг Засгийн Газраас Монгол Улсын Хөгжлийн банканд зөвшөөрсөн байна. Энэ нь “үнэтцаас болон Засгийн газрын баталгаа гаргах тухай” Монгол Улсын Засгийн газрын 2011 оны Гуравдугаар сарын 16-ны өдрийн 85-р тогтоол ёсоор 5 жилийн хугацаатай 250 тэрбум, 10 жилийн хугацаатай 250 тэрбум, 15 жилийн хугацаатай 300 тэрбум төгрөг гэсэн өрийн бичиг байх ажээ.