Хүн бүр өөрийн гэсэн тохилог орон сууцтай байхыг мөрөөддөг. Гэвч хувийн амьдралдаа зориулах эдийн засгийн хөрөнгө оруулалт хүрэлцэхгүйн улмаас энэ мөрөөдөл тэр болгон хүний хувьд хэзээ ч үл биелэгдэх мөрөөдөл болдог. Тэгвэл Канадын эрдэмтэд энэ их хөрөнгө оруулалтыг үнэмлэхүй хэмжээгээр багасгаж чадах угсармал модон байшинг зохион бүтээсэн юм. Үйлдвэрийн аргаар бэлгэсэн угсармал барилга нь барилга угсралтын явцыг түргэтгэх, хүн хүч, барилгын материалыг хэмнэх давуу талтай юм.

SIP (Дулаан тусгаарлагчтай хавтан) технологи нь  өндөр хүчин чадалтай үйлдвэрлэлийн аргаар хувийн орон сууцны ханы хавтан, шал, дээврийг хийх арга юм. SIP хавтан хийхдээ OSB хэмээх үртсэн шахмал хавтангын хооронд дулаан тусгаалагч хөөсөнцөр оруулан, тодорхой зузааны хэмжээтэйгээр хийгддэг.  SIP хавтан нь анх 1950 онд зохион бүтээгдсэн ба 1952 онд АНУ-ын Мичиган мужид анхны SIP хавтангийн байшинг барьжээ.

Америк Канадад зөвшөөрөгдсөн олон улсын стандартын шаардлагын дагуу хийгдэж байгаа SIP хавтангийн үйлдвэр нь хэрэглэгчийн захиалсан зургийн дагуу тухайн орон нутгийн нөхцөл байдалд бүрэн тохирохоор бэлтгэж өгдөг нь онцлог юм.

Өөрөөр хэлбэл үйлдвэрийн технологид үл захирагдана гэсэн үг. Угсрахад нэн хялбар энэ барилгын бүх эд анги маш сайн урьдчилан тооцоолсон зураг төслийн дагуу хийгддэг. Хаалга, цонх, шал, гал тогооны тавиур, угаалгын өрөөний хэрэгсэл, шат гэх мэт эд ангиуд нь ердөө эвлүүлдэг тоглоом мэт амархан угсрагдана.

SIP технологиор 3 хүртлэх давхар байшинг барьж болохоос гадна хуучин байшинг хүртэл сэлбэн сэргээж болно. Уншигч та өөрийнхөө хуучин байшингийн суурин дээр шинэ байшин босгоход мэдээж урт өргөн нь стандартын биш байж болно. Тэгвэл нарийн хэмжээгээ өгөхөд л таны байшинг ямар ч зовлонгүйгээр авчираад угсрахаар үйлдвэрлэгч бэлтгэж өгнө гэсэн үг.

Үндсэндээ компьютерийн  маш нарийн тоцоогоор таны байшинг тооцоолж бэлтгэсэний үндсэн дээр хавтан бэлтгэгч машин 1 ч миллиметр алдахгүйгээр хавтангийн зүсэлтийг хийж байшингийн эд ангийг бэлтгэнэ.

SIP хавтанг цаг агаарын нөхцөл байдал болон дотор гадна ханы ангилалаас нь шалтгаалан 10 см-ээс 35,5 см хүртэл зузаантай хийнэ.  Хавтанг үйлдвэрлэж байгаа материал, түүхий эд нь хүний биед чмар нэгэн хор хөнөөлгүй байх ёстой бөгөөд удаан жил яс чанараа алдахгүй байх үндсэн шаардлагыг хангасан байх ёстой.