Өнгөрсөн 4,5 дугаар сард хууль бус агнуур, байгаль орчны ноцтой зөрчилтэй тэмцэх "Ирвэс 3″ шуурхай багийн бурэлдэхүүн Хар ус нуур, Ховд Буянт голын сав газар, Чоно харайхын гол, Эрдэнэбүрэн сумын Сэжигтэйн хавцал, Буянт, Мянгад, Дөргөн, Ховд сумдын нутгаар гэнэтийн отолт хийх аргаар, хяналт шалгалт явуулжээ. Энэ үеэр хууль бусаар усны шувуу, загас агнаж байсан багагүй зөрчил илэрсэн тухай тус багийн ахлагч, Байгаль хяналтын улсын  ахлах  байцаагч  Ш.Гантулга мэдээллээ.

Шуурхай ажиллагааны үеэр Ховд голын гүүр, Чоно  харайхын гүүр, Сэжигтэйн хавцал зэрэг загасны үржлийн  үед загас бөөнөөр цугладаг гол газруудад 61 тээврийн хэрэгсэл бүхий 171 иргэн хууль бусаар загас болон усны шувуу агнахаар очсон байсантай таарчээ. Тэдний хууль бус үйлдлийг таслан зогсоож, Монгол Улсын ан агнуурын тухай болон амьтны аймгийн тухай хуулийн дагуу торгууль шийтгэл оногдуулсан байна. Энэ үеэр бүртгэлгүй, галт зэвсэгийн үнэмлэхгүй зургаан буу илэрснийг хураан авч, цагдаагийн байгууллагад шилжүүлжээ. Тэрчлэн Ховд аймгийн Жаргалант сумын иргэн Балт Хар ус нуурын байгалийн цогцолборт газрын хязгаарлалтын бүсэд ОХУ-ын дөрвөн иргэнийг дагуулан очиж, хууль бусаар загас агнах гэж байсныг үйлдэл дээр нь зогсоожээ. Мөн шуурхай багийнхан Дөргөний УЦС-ын дээр очиж загас өнгөрөөх байгууламжийн ажиллах зарчмыг ажигласан байна. Тэдний хэлж байгаагаар тус байгууламжийн ус тавих хаалтыг 10 см-ээс илүү нээх боломжгүй байгаагаас загаснууд тэрхүү нээгдсэн сувгаар өнгөрч, далангийн нөгөө тал руу гарах явдал нэлээд хязгаарлагдмал байгаа гэнэ. Хаалтыг 10 см-ээс илүү нээхэд сувгийн дээгүүр ус хальж, даланг эвдэх аюултай байгаа учир энэ байгууламж анхнаасаа тооцоо судалгаа муутай баригдсан байна хэмээн тэд үзэж байна.

Үүнээс гадна "Ирвэс 3″ багийн хяналтад 60 ширхэг хадран загасыг зөвшөөрөлгүй агнан, утаж зарах гэж байсан Дөргөн сумын иргэн Дондогдорж, мөн 15 ширхэг хадран загасыг дээрх байдлаар ашиг хонжоонд ашиглахыг завдсан Батням нарын хууль бус үйлдэл өртжээ.

Эх сурвалж www.inet.mn