Гандан хороолол Баянгол дүүргийн 16-р хорооны нутаг дэвсгэрт нийт 53 га талбайтай 1743 айл өрх, 7817 хүн амьдарч байгаа судалгаа бий. Тус газар төлөвлөлтөөрөө Бурхан шашны төв, шашны зан үйл болон аялал жуулчлалын бүс байх бөгөөд эргэн тойрон нь 2 давхар амины орон сууцны хороолол болох юм. Одоо амьдарч буй иргэд нэгдээд 2 давхар амины орон сууц барих боломжтой. Гол нь тухайн айл дангаараа хашаандаа орон сууц барих бус хэсэг бүлгээрээ нэгдэн авто машины гаражтай 2 давхар, Ерөнхий төлөвлөгөөний дагуу, зураг төслөө батлуулсан, барилгын норм ба дүрмийн шаардлагыг хангасан барилга барихад дулаанаар хангах боломжийг бүрдүүлэхээр ажиллаж байна. Тухайлбал Гандан хорооллыг цаашид инженерийн төвлөрсөн шугам сүлжээнд холбох зорилгоор Ерөнхий төлөвлөгөөний зурагт хийх тодотголын ажлыг “Архитектур нэгдэл” ХХК гүйцэтгэж байгаа. УИХ гишүүн Ц.Мөнх-Оргил болон Нийслэлийн Барилга, хот байгуулалт, төлөвлөлтийн газар, Баянгол дүүргийн Засаг даргын Тамгын газрын мэргэжилтнүүд 16-р хорооны иргэдтэй хамтарсан уулзалтыг хоёр удаа зохион байгуулж, НИТХурлын Тэргүүлэгчдийн 2007 оны 05-р сарын 09-ний өдрийн 84 дүгээр тогтоолоор батлагдсан “Гандан тэгчилэн хүрээ” амины орон сууцны хорооллын Ерөнхий төлөвлөгөө болон тус хорооллын шинэчилсэн Ерөнхий төлөвлөгөөний зураг төслийг танилцууллаа.