Туул голын бохирдол, түүний шалтгаан нөхцөлийг тоггоож, арга хэмжээ авч зохицуулахаар голын дагуу байрлах аж ахуйн нэгж, элс хайрга, тоосгоны үйлдвэрүүдэд Мэргэжлийн хяналтын ерөнхий газраас шалгалт хийжээ. Өчигдөр тус газраас шалгалтын дүнг танилцуулсан юм.

Нийслэлийн хэмжээнд элс хайрга, тоосгоны 253 аж ахуйн нэгж үйл ажиллагаагаа явуулж байна. Эдгээр үйлдвэрүүд нийслэлд байгаа цагт Туул голын хэвлийд халдах байдал үргэлжилсээр байхыг мэргэжлийн хяналтынхан онцолж байна. Тиймээс дээрх аж ахуйн нэгжүүдийг хотоос гаргах хэрэгтэй хэмээн мэдэгдэж байна. Мөн элс, хайрга олборлож байгаа үйлдвэрүүдийн бүтээгдэхүүнийг гарал үүслийн гэрчилгээтэй болгох саналыг холбогдох албаныханд тавьж байгаагаа дуулгасан юм. Энэ удаагийн шалгалтаар хайрга бутлагч гурван аж ахуйн нэгжийн үйл ажиллагааг зогсоосон байна. Өнгөрсөн жил 15 аж ахуйн нэгжийн үйл ажиллагааг зогсоож байжээ. Гэхдээ тусгай зөвшөөрлийг нь цуцалсан эдгээр аж ахуйн нэгжүүдийн олборлолт явуулж байсан тухайн газруудад нөхөн сэргээлтийн ажил орхигдож байгаа нь олон сөрөг үр дагавар авчирч буй гэнэ. Тухайлбал, саяхан "Эв олд импекс" компанийн олборлолт хийж байсан нүхэнд бага насны хүүхэд унаж амиа алдсан хэрэг гарсан. Тиймээс мэргэжлийн хяналтын улсын байцаагчид тусгай зөвшөөрлийг нь цуцалсан эзэнгүй орхигдож байгаа газрыг иргэдэд эзэмшүүлж амралт зугаалгын бүс байгуулах хэрэгтэй гэж үзэн холбогдох байгууллагуудад саналаа хүргүүлээд байгаа юм байна.

Үүнээс гадна гэр хорооллын дунд байрлаж байгаа тоосго, асфальтын үйлдвэрүүдийг хотоос гаргах хэрэгтэй гэж үзэж байна. Дээрх үйлдвэрүүд нь хорт хий ихээр ялгаруулахаас гадна дуу чимээ гаргаж оршин суугчдын ая тухыг алдагдуулах зэрэг сөрөг нөлөө үзүүлж байгаа учраас ийнхүү хотоос гаргах хэрэгтэй гэв. Нийслэлийн хэмжээнд нийтдээ тоосгоны 38, асфальтын дөрвөн үйлдвэр үйл ажиллагаа явуулж байгаа аж.