Нийслэлийн нутаг дэвсгэрт цас их хэмжээгээр орсон, цаашид ч хур тунадас  орох төлөвтэй байгаа тул агаарын хэм огцом дулаарсан үед

шар усны үер болох магадлалтай юм. Цаг агаар дулаарч буй энэ үед иргэд гол горхи, цөөрмийн мөсөн дээгүүр тээврийн хэрэгслээр зорчих, мал туух, явган зорчихдоо болгоомтой байхгүй бол мөс цөмөрч амь насаа алдах, эд хөрөнгөөрөө хохирох эрсдэл гарч болзошгүй байна. Энэ жил гол, горхины мөсний зузаан өмнөх жилүүдтэй харьцуулахад харьцангуй бага байгаа юм.  

Дээрх  үүсч болзошгүй нөхцөл байдлыг үндэслэн Нийслэлийн Засаг даргын 2011 оны 02 тоот “Шар усны үерийн аюулаас урьдчилан сэргийлэх арга хэмжээг эрчимжүүлэх тухай” албан даалгаврыг гаргаад байна.  Уг албан даалгавраар үерийн хамгаалалтын барилга байгууламжийн ашиглалтын хэвийн найдвартай үйл ажиллагааг ханган ус гаргуур, далан сувгийн цэвэрлэгээний ажлыг шуурхай зохион байгуулах, ус чөлөөтэй нэвтрэх боломжийг алдагдуулахуйц, урсацын чиглэлийг өөрчилж болзошгүй зөрчлүүдийг илрүүлэн засуулах, ус цуглардаг гуу жалга, нэвтрүүлэх хоолойн ахуйн гаралтай хог хаягдал, хуримтлагдсан цас, мөсийг тухайн орчны оршин суугчдын оролцоотой цэвэрлэх ажлуудыг зохион байгуулахыг мэргэжлийн байгууллагуудад үүрэг болголоо.

Мөн үерийн хамгаалалтын хэвийн үйл ажиллагааг алдагдуулж байгаа шинээр баригдаж буй барилга, байгууламжийн үйл ажиллагааг зогсоох, цаашлаад газар чөлөөлөх хүртэлх арга хэмжээ авахыг даалгасан байна.  

Нийслэлийн Засаг даргын 02 тоот албан даалгаврыг хэрэгжүүлэх хүрээнд  Нийслэлийн Онцгой байдлын газрын дарга комиссар Х.Батбилэгийн баталсан удирдамжийн дагуу Улаанбаатар хотын үерийн хамгаалалтын барилга байгууламжийн ашиглалтын байдалд үзлэг шалгалт хийх ажлын хэсэг томилогдон, энэ сарын 15-16-ны өдрүүдэд зургаан дүүрэгт ажиллахаар боллоо.

Ажлын хэсгийнхэн үзлэг шалгалтын үеэр ус зайлуулах далан суваг, түүний барилга байгууламжийн ашиглалт, гаргалгаа хоолойнуудын ус нэвтрүүлэх чадвар, үерийн аюулаас айл өрх, иргэдийг хамгаалах урьдчилан сэргийлэх бэлтгэл ажлыг хэрхэн хангасан, мөн цэвэрлэх шаардлагатай далан сувгуудын судалгааг гаргаж илэрсэн зөрчил, дутагдлыг засуулах, цаашид авах  арга хэмжээгээ тодорхойлох юм.