Улаанбаатар хотод  1950 оноос хойш ерөнхий төлөвлөгөө боловсруулж эхэлсэн түүхтэй юм байна. Энэ тухай мэдээллээр Нийслэлийн зураг төслийн хүрээлэнгийн захирал С. Цахиур танилцуулгаа эхлэв. Тэрээр Нийслэлийн иргэдийн төлөөлөгчдийн хурлын Тэргүүлэгчдийн хурал дээр Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, хотын 2030 оны хөгжлийн төсөөллийн үзэл баримтлалын талаар мэдээлэл өгсөн юм.  Ерөнхий төлөвлөгөөг 3 түвшинд хийдэг аж. Нийслэлийн нутаг дэвсгэрээс 200 км-ийн радиуст, Улаанбаатар бүсийн түвшинд, Улаанбаатар хотын түвшинд гэсэн 3 түвшин бий. 
                 Ерөнхий төлөвлөгөөг 20 жилээр, тодотголыг 5 жил тутамд нэг удаа гэсэн дэлхий нийтийн жишгээр ажлаа явуулж буйгаа С. Цахиур хэллээ. Өнөөдөр Улаанбаатар хотод тулгамдсан асуудал хүн амын төвлөрөл болоод байна. Өөрөөр хэлбэл нийт хүн амын 40,6 хувь нь нийслэлдээ оршин сууж байгаа нь гажиг тогтцолцоо гэнэ. Азийн  бусад орны нийслэл  хотуудын хүн амыг сонирхуулвал Бээжинд нийт хүн амынх нь 1 хувь, Токиод 6,4 хувь, Сөүлд 20 хувь нь тус тус амьдардаг. Хамгийн олон хүн нийслэлдээ шигдсэн гэх Сөүлээс манай Улаанбаатар 2 дахин их хүн ам агуулж байгаа гэсэн сонирхолтой мэдээллийг тэрбээр өгч байлаа.  Орон нутгаас Төв, Сэлэнгэ, Дундговь, Завхан, Дорноговь, Архангай аймгаас хот руу чиглэсэн шилжилт хөдөлгөөн их байна.  Ингэснээр хөдөлмөрийн насны ажилгүйчүүдийн 30 хувь нь хотод амьдардаг болохыг судалгаа харуулж байгаа юм. Өөр ч бас сонирхолтой тоо баримтыг зураг төслийн хүрээлэнгийнхөн өгч байв. ДНБ-ний 50,5 хувийг Улаанбаатар хот дангаараа хангадаг нь мөн л гаж үзэгдэл гэсэн. Тухайлбал эдийн засгийн хөгжлөөр тэргүүлж буй урд хөршийн нийслэл улсынхаа ДНБ-ний 5,4 хувийг хангадаг байна.  Улсын хэмжээнд бүртгэлтэй аж ахуйн нэгжүүдийн 70 хувь нь нийслэлд харьяалагдаж байгаа нь таагүй дүн болохыг өгүүлэв.
              Төлөвлөлт,  тодотголтой холбоотой судалгаан дээр үндэслэн дээрхи мэдээллийг өгсний зэрэгцээ Улаанбаатар 2030 онд ямар хот байх вэ гэдэг төсөөллийг хэллээ.  Байгаль орчин, экологийг дээдэлсэн, эрүүл ногоон хот болох төсөөлөл байна. Сайн засаглал,  эрчимтэй хөгжиж буй дагуул хот тосгодтой, азийн аялал жуулчлалын төв болно гэж тодорхойлсон байв. Улаанбаатар бүсийн хөгжлийн үзэл баримтлалд Гацууртыг амралт сувилал, байгалийн цэвэр аялалын бүс, Налайх, Хонхорыг өрхийн аж ахуй, тээвэр ложистикийн бүс, Багануурыг түлш, эрчим хүч үйлдвэрлэлийн төв байхаар тусгажээ.  Эдгээр сайхан мөрөөдөл цаасан дээр буухаас амьдралд хэрэгжиж байгаа нь хаана байна гэсэн асуултыг   Тэргүүлэгчид тавьж байв. Аль ч улс орон, нийслэлд төлөвлөгөө гэж бий. Харин төлөвлөгөөг хэрэгжүүлэх нь ховор байдгийг Зураг төслийн хүрээлэнгийн захирал хэлэв.
                Тухайлбал 50 оны анхны ерөнхий төлөвлөгөөнд Сүхбаатарын талбай тойроод нэг ч өндөр барилга барихгүй байхаар, төв цэнгэлдэх хүрээлэнгийн  орчимд ногоон бүс байхаар тусгасан нь өнөөдөр эсрэгээрээ явж байна. Уг нь төлөвлөлтийн дагуу хот хөгжих ёстой.  Цаашид ерөнхий төлөвлөгөө, тодотголыг дагаж мөрдөх байх аа гэв. Улаанбаатарыг хотыг 2020 он хүртэл хөгжүүлэх ерөнхий төлөвлөгөөний тодотгол, 2030 оны хөгжлийн төсөөллийн үзэл баримтлалын талаар мэргэжилтнүүд НИТХ-д танилцуулга хийхийг Тэргүүлэгчид дэмжлээ.