Зуслангийн газрыг өмчлүүлнэ гэсээр цөөнгүй жил болж байгаа. Энэ тухай Нийслэлийн газрын албанаас мэдээлэл авахыг хүсэхэд Барилга хот төлөвлөлтийн газар зуслангийн газрын төлөвлөлтийг удаашруулж байгаатай холбоотой гэсэн хариулт өглөө. Харин Нийслэлийн барилга хот төлөвлөлтийн газраас Нийслэлийн зураг төслийн хүрээлэнгээс тодруулах хэрэгтэй гэсний дагуу уг хүрээлэнгийн дарга Л. Солонготой уулзаж ярилцлаа.

-Зуслангийн газар төлөвлөлтийн ажил ямар шатандаа явж байна вэ?

-Зураг төслийн ажлын өмнөх судалгааны ажлыг бид 7 сарын 1-нээс эхлүүлээд байна. Энэ дагуу Шарга Морьт, Баянбулаг, Майхан толгойн зэрэг зуслангийн 27 аманд судалгаа хийгдэх ёстой. Судалгааны гол зорилго нь эмх замбараагүй баригдсан зуслангийн айлууд дунд гарц орц, хог, нийтийн бие засах газар гаргах асуудлыг шийдэх боломжийг тодорхойлоход оршиж байгаа. Жишээ нь 4 айлын дунд орц гарцгүй тохиолдолд бүх айлаас тэнцүү хэмжээний газар дундын эзэмшилд оруулах гэх мэтээр шийдсэнээр тухайн айлуудад ч хэрэгтэй, гал гарах гэх мэт асуудлыг шийдэхэд ч дөхөмтэй болох юм.

-Айлууд газраасаа өгөх асуудалд маргаан хэр гарах бол?

-Манай дээр бид газраасаа өгөхгүй гэсэн хүмүүс эхнээсээ ирцгээж л байна. Гэхдээ нэг айлын эрх ашгаас илүү нийтийн эрх ашиг, аюулгүй байдлыг бодолцох ёстой. Гал түймэр гарлаа гэхэд галын машин очих боломжгүй айлууд цөөнгүй байна. Харин бид том байшин барилгыг буулгахгүйгээр аль болох хашааг багасгах, буулгах арга хэмжээг авна. Зарим тохиолдолд нөхөн төлбөрийн асуудал хөндөгдөж болох ч кадастрт ороогүй, зөвшөөрөлгүй айлуудад нөхөн төлбөрийн асуудал огт байхгүй гэсэн байр суурийг баримталж байгаа. Айлуудын эзэмшиж байгаа газрын хэмжээг ч эргэн харах ёстой гэж бодож байна. 0.05 га-гийн зөвшөөрөл олгож байх үед байх ёстой хэмжээнээс хэд дахин том газар авсан  хүмүүс олон байна. Мөн том блокон хашаа барьчихсан айлууд хашаа байшингаа онгойлгож өгөхгүй бидний судалгааны ажилд хүндрэл учруулж байна.

-Зуслангийн бие засах газрын асуудал зун болохоор л хөндөгдөөд баахан ярьж байгаад намраас намждаг шүү дээ. Энэ асуудлыг хэрхэн шийдэхээр төлөвлөж байна вэ?

-Судалгааны явцад харж байхад бие засах газрын асуудал үнэхээр хүнд байна. Яахав нэг үеэ бодоход айлууд жорлонгоо нэг доор бөөгнүүлсэн байна. Гэвч жалганд жорлон хийгээд борооны усаар орчныг нь бохирдуулж байгаа тохиолдол ч цөөнгүй байгаа нь харагдлаа. Ер нь цаашид шууд газарт шингэдэг биш соруулж авдаг 00-ыг олноор байгуулж асуудлыг шийдэх боломжтой гэж үзэж байгаа. Маш нарийн судалгаа хийхгүй бол зуслангийн газар төлөвлөлтийг хийхэд хүндрэл учирч байна.

-Яг ямар хүндрэлүүд учирч байна вэ?

Ерөнхийдөө айлууд яг зусландаа гарчихсан эзэнтэй, бас хогоо ил задгай хаячихсан үеэр судалгаа хийж байгаа нь нэг талаасаа олзуурхууштай хэрэг ч манай иргэдийн ухамсар, бидний ажлыг ойлгох чадвар сул байгаа нь бэрхшээлтэй байна. Бид хашаа болгоноор очиж кадастрын зурагтай нь тулгаж, хашаа байшингийн чанарыг тодорхойлох, хаагуур бохир, хогийн цэгүүдийг байгуулж болох тухай судалгааг хийж байна. Ар Согоотоос эхэлсэн ч харин Шарга Морьт, Гүнт, Жигжидийн айлуудыг түр орхисон. Нягтрал ихтэй эдгээр газруудад томоохон хүчээр далайцтай орохгүй бол болохгүй гэдэг нь харагдсан. Айлуудын ихэнх нь дундын орц гарцын зориулалтаар газраасаа өгөх сонирхолгүй байна. Мөн оюутнуудыг судалгаанд дайчилж эхэлсэн.

-Танай судалгааны ажил яг хэзээ дуусах вэ? Зуслангийн газар төлөвлөлт хийгдсэний дараагаар газрыг өмчлүүлэх ажил эхэлнэ гэж газрын албанаас мэдээлэл өгсөн.

-9-р сард багтаах үүрэг өгсөн ч амжих эсэх нь тодорхойгүй байна. Газар өмчлөх тухайд мэргэжлийн хүмүүс зуслангийн газрыг яаран өмчлүүлэхийг дэмжихгүй байгаа. Маш сайн боловсруулсан төлөвлөлт, тэрийг чанд мөрдөх хууль эрхзүйн механизмгүйгээр газрыг өмчлүүлбэл маш замбараагүй байдал үүснэ. Зөвхөн эзэмших эрхтэй зуслангийн айлууд дундын орц гарц, нийтийн бие засах газар байгуулахад ийм эсэргүүцэл үзүүлж байхад өмчлүүлчихвэл байдал бүр дордох болно. Иймээс зуслангийн газар өмчлүүлэх асуудлыг сайтар төлөвлөж, хэлэлцэж байж шийдээсэй гэж хүсч байна.