Гаалийн тарифын зөвлөл өнгөрсөн баасан гарагт хуралдаж барилгын зарим нэр төрлийн материалд ногдуулж байгаа гаалийн албан татварыг нэмэгдүүлэх, хөдөө аж ахуйн зориулалттай машин механизм, тоног төхөөрөмж, бордоо, ургамал хамгааллын бодисыг гаалийн албан татвараас чөлөөлөх, үр тарианд ногдуулж байгаа гаалийн албан татварыг улирлын ялгаваргүйгээр жилийн турш 20 хувь болгож нэмэгдүүлэх зэрэг хэд хэдэн асуудлыг хэлэлцэж тодорхой шийдвэр гаргажээ.

Хуралдаанаар барилгын зарим нэр төрлийн материалд ногдуулж байгаа гаалийн албан татварыг нэмэгдүүлэх нь зүйтэй гэх шийдвэр гаргасан байна. Энэ нь үндэсний үйлдвэрлэгчдээ дэмжих зорилготой гэжээ.

Тодруулбал, 2011 онд манай улсад 500 гаруй барилгын материалын үйлдвэр үйл ажиллагаа явуулж байгаа ч урд хөршөөс их хэмжээний барилгын материал орж ирдэг учир үндэсний үйлдвэрлэгчид бүрэн хүчин чадлаараа ажиллаж чаддаггүй байна. Тиймээс ижил нэр төрлийн импортын бараанаас хамгаалах зорилгоор үйлдвэрлэлээс хангах хэрэгтэй хэмээн зөвлөлийн гишүүд онцолж дэмжжээ.

Ихэнх үйлдвэрлэгчид гадаадаас импортлох боломж багатай материалыг үйлдвэрлэж байгаа. Импортын ихэнх бүтээгдэхүүнүүд дотооддоо үйлдвэрлэх боломжгүй орчин үеийн технологийн бүтээгдэхүүнүүдийг импортолж байгаа.

2011 онд барилгын материалын үйлдвэрлэгчид барилга угсралтын ажлыг материалаар хангаж дийлэхгүй байгаа билээ. Иймд энэ шийдвэр нь барилга, орон сууцны үнийг нэмэгдүүлэх шалтгаан болохоор байна.