Орон сууцны XIV хороолол нь Нийслэлийн Баянзүрх дүүргийн 13, 14 дүгээр хорооны нутаг дэвсгэрт 235 га талбайд бүтээн байгуулалт хийгдэхээр төлөвлөгдөөд байгаа юм.

     НИТХТ-ийн тогтоолоор батлагдсан хэсэгчилсэн ерөнхий төлөвлөгөөний дагуу 15 мянган айлын орон сууц баригдаж, 65 мянган хүн оршин сууж, 7800 сурагчтай сургууль, 3700 хүүхдийн цэцэрлэг, өдөрт 2175 хүн үйлчлүүлэх хүчин чадалтай өрхийн эмнэлэг, 1200 ажлын байр бүхий оффисын барилга, 4000 орчим хүн ажиллах соёл, ахуй үйлчилгээний барилга байгууламж гээд иж бүрэн цогцолбор хороолол баригдахааар яригдаж байгаа юм.

    Гэхдээ энэхүү их бүтээн байгуулалтын ажил хэзээ бүрэн биелэлээ олох вэ? Гэсэн асуулт тодорхойгүй хэвээр байгаа билээ. Харин үүнд хариулт болгон ЗТБХБЯ-ны дэргэд байгуулагдсан XIV хорооллыг барилгажуулах Төслийн нэгж тайлангаа тавьлаа. Тайлангийн хуралд УИХ-ын эрхэм гишүүн Ц.Батбаяр, Нийслэлийн Засаг даргын орлогч Б.Мөнхбаатар, Нийслэлийн Барилга хот байгуулалт төлөвлөлтийн газрын орлогч дарга Э.Анар, Ерөнхий инженер Т.Эрдэнэтуяа, Хөрөнгө оруулалтын газрын Төсөл, хөрөнгө оруулалтын хэлтсийн дарга Г.Ганбаяр, 14-р хорооллын ерөнхий хөрөнгө оруулагч Тайвань Монголын хамтарсан “K and T” корпорацийн төлөөлөл оролцсон юм.

     Хуралд оролцогсод Нийслэл хотын төвд байрлах XIV хорооллыг барилгажуулах ажлыг түргэтгэх, үлгэр жишээ хороолол болгохын тулд тулгарч буй хүндрэл бэрхшээл болон ажлын удаашрал, явцын талаар ярилцаж санал солилцлоо. Төслийн нэгж болон гүйцэтгэгч компанийн төлөөллүүд газар чөлөөлөх асуудалтай холбон барилгын ажил удаашралтай байна гэсэн хариултыг хэлсэн юм. Тухайлбал 60 айлаас 55 нь барилгажуулах ажлыг зөвшөөрч, 5 айл татгалзахад ажил зогсдог. Тиймээс нэн тэргүүнд хууль эрх зүйн орчныг бүрдүүлэх шаардлагатай болохыг онцлон тэмдэглэлээ.