Эм Ай Си Жи ХХК-ийн гүйцэтгэх захирал Б.Билэгтсайхан: Үйлчилгээний төв бариад шинээр бизнес эрхлэх гэж байгаа хэн бүхэн хамгийн эхлээд тухайн зах зээлийн потенциалыг судлах шаардлагатай
Маркетингийн судалгаа, хөрөнгө оруулалтын зөвлөх үйлчилгээ үзүүлдэг “ЭМ АЙ СИ ЖИ” ХХК-ийн гүйцэтгэх захирал Б.Билэгтсайхантай ярилцлаа. Бидний яриа барилгын компаниудын судалгааны эрэлт хэрэгцээ, бизнесийн байгууллагын судалгааны үнэ цэнэ, судалгаа хийгдэх үйл явцын талаар өрнөсөн юм.
Сүүлийн жилүүдэд барилгын салбартай холбоотой төрөл бүрийн судалгаа хийгдэх болжээ. Үйлчилгээний зориулалттай барилга бариад шинэ зах зээлд ажиллах гэж байгаа хүмүүст хандан зөвлөгөө өгөөч?
Манайд маш олон барилгууд сүндэрлэж байна. Энэ бүх барилгууд нь орон сууц, үйлдвэрлэл, үйлчилгээний зориулалттай байгаа. Үйлчилгээний зориулалттай баригдаж буй барилгуудын гол асуудал нь ямар үйлчилгээ байх вэ? Тухайн бүтээгдэхүүн үйлчилгээнд зах зээл ямар байгаа бол гэсэн асуулт тулгардаг.
Барилгын компаниуд шинэ бүтээгдэхүүн, үйлчилгээ нэвтрүүлэх гэж буй бол зах зээлийн судалгаа, хэрэглэгчийн судалгаа, бүтээгдэхүүний судалгаа, өрсөлдөгчийн судалгааг тодорхой түвшинд хийх хэрэгтэй.
Одоо үед ямарч судалгаагүй, үйл ажиллагаа шинээр эрхэлдэг байдал харьцангуй бага байгаа байх. Миний бодлоор бизнесийн өрсөлдөөн бүхий л салбарт нэмэгдэж байна. Үүнийг дагаад өрсөлдөгчдөөсөө илүү ухаалаг байхыг бизнес эрхлэгчээс шаардаж байна.
Үүний тулд нэгэн үйлчилгээний төв бариад шинээр бизнес эрхлэх гэж байгаа хэн бүхэн хамгийн эхлээд зах зээлийн потенциал боломжийг судлах шаардлагатай. Дараа нь энэ зах зээлд хэн хэн, ямар үүрэгтэй оролцож байна. Миний энэ зах зээлд амжилт гаргах боломж, давуу талууд юу вэ? гэдгээ сайтар тунгаан гаргаж ирэх хэрэгтэй.
Нэгэн үйлчилгээний төв бариад ашиглалтанд оруулж байгаа компани судалгаа хийсний ач холбогдол юу вэ?
Тухайн үйлчилгээний төвийн хамгийн чухал зүйл бол манай хэрэглэгч хэн бэ? Ямаг зан төлөвтэй вэ гэдгийг тодорхойлох. Энэ бүгдийг хэрэглэгчийн зан үйлийн судалгаагаар тогтооно. Та өрсөлдөгчөөсөө илүүгээр хэрэглэгчиддээ ямар санал тавих вэ гэдэг чухал. Үүнийг хэрэглэгчийн судалгааг хийсний дараа гаргана. Тэгэхээр судалгаа бол хамгийн үнэ цэнэтэй зүйл юм.
Таны бодлоор судалгааны хамгийн чухал хэсэг нь юу вэ?
Судалгааны мэдээлэл цуглуулах ажил нь хамгийн чухал хэсэг нь байдаг. Зарим хүмүүс оюутнуудаар мэдээлэл цуглуулах ажлыг даалгаад орхидог. Нарийн хяналтын системгүй ажигладаг. Энэ байдал манай томоохон компаниудад ч байдаг зүйл юм. Судалгааны чанар буюу амин зүрх нь хэр үнэн бодит мэдээлэл цуглуулж чадсан бэ гэдэгт байдаг. Мэдээж хэрэг маш сайн анкет боловсруулах, үр дүнг оновчтой харьцуулах, тайлан боловсруулалт бас чухал л даа.
Мэдээлэл цуглуулах ажлыг маш сайн бэлтгэгдсэн баг цуглуулах шаардлагатай. Сайн багийг судалгааны удирдамжийн дагуу ажлуулах, ажлын чиг үүргийг сайн гаргах, хяналтаа өндөрсгөх, сургаж дадлагажуулах байдлаар бий болгодог.
Судалгаа хийж байх явцад олон асуудал тулгардаг уу?
Судалгаа хийх явцад судлаачдын ажиллах ур чадвар, ажлын хариуцлагатай холбоотой асуудлууд тулгардаг. Тэр бүхийг шийдвэрлэж ажиллахгүй бол судалгаа хийх нь үр дүнд сөргөөр нөлөөлдөг.
Судалгааны ажил нь ямар шат дараалалтай байдаг вэ?
Ямар ч судалгааг хийнэ гэдэг маш сайн зохион байгуулалт, нарийн төлөвлөгөөтэй ажиллахыг шаарддаг. Тухайлбал хэрэглэгчийн зан төлвийн судалгааг хийх гэж байгаа бол эхлээд асуулгаа боловсруулна. Дараа нь анхдагч мэдээлэл цуглуулах ажил хийгдэж, үр дүнг боловсруулдаг. Судалгааны үр дүнг боловсруулсаны дараа тайлан, төлөвлөгөөний ажил хийгдэнэ. Эдгээр ажлууд нь тус бүрийн өөрийн хугацаатай, шат дараалалтай юм. Манай компаний тухай илүү ихийг мэдэхийг хүсвэл www.bizdata.mn сайт болон 70117823, 91111511 дугаарын утсаар лавлаж асууж болно.
Ярилцлага өгсөн танд баярлалаа. Цаашдын ажил, амьдралд чинь амжилт хүсье.
Баярлалаа. Танай сэтгүүлийн хамт олонд ажлын өндөр амжилт хүсэн ерөөе.