“УС СУВГИЙН ШИНЭ ТЕХНИК ТЕХНОЛОГИ”-ИЙГ ТАНИЛЦУУЛАХ, ТУРШЛАГА СОЛИЛЦОХ СУРГАЛТ, СЕМИНАРЫГ ЯПОН УЛСАД ЗОХИОН БАЙГУУЛЛАА. 

Шинэ бүтээн байгуулалт, дунд хугацааны зорилтот хөтөлбөрийг хэрэгжүүлэх үйл ажиллагааны төлөвлөгөөний 4.4.4.2.-т заасан “Салбарын мэргэжилтнүүдийн мэргэжлийг дээшлүүлэх, чадавхижуулах” ажлын хүрээнд тус алба нь Салбарын инженер техникийн ажилтнуудын мэргэжлийг дээшлүүлэх, чадавхижуулах, туршлага солилцуулах, инженерийн дэд бүтцийг сайжруулах, дэвшилтэт техник технологийг салбарын инженерүүдэд биетээр үзүүлж нутагшуулан нэвтрүүлэх зорилгоор Япон Улсад энэ оны VII/22-ноос VIII/2-ны хооронд “Ус сувгийн шинэ техник технологи” сэдэвт сургалтыг амжилттай зохион байгууллаа.

Энэхүү сургалтыг манай алба Япон Улсын “Бохир усны ассоциаци”, “Цэвэр усны ассоцици”, Монгол Улсын ЗГХАгентлаг “Газрын харилцаа, барилга, геодези, зураг зүйн газар”-тай хамтран зохион байгуулсан юм.

            Сургалтын явцад биднийг Япон Улсын “Бохир усны ассоциаци”, “Токио  хотын бохир усны алба”, “Токио хотын бохир усны үйлчилгээний компани”, “HELS аж үйлдвэрийн компани”, “Сайтама хотын цэвэрлэх байгууламжийн төв”, “Цэвэр усны ассоциаци”, “Сакай” цэвэр усыг халдваргүйжүүлэх байгууламж /эрчим хүчний хэмнэлтэт экологийн технологиор ажилладаг/, “Кинүта” цэвэр усыг халдваргүйжүүлэх байгууламж /Мембаран болон ультра ягаан туяаны технологийг нэвтрүүлэн ажиллаж байгаа/  зэрэг байгууллагууд хүлээн авч, Япон Улсын ус сувгийн хууль, эрх зүйн орчин түүний тогтолцоо, ус сувгийн барилга байгууламж хариуцсан байгууллагын бүтэц зохион байгуулалт болон энэ төрлийн барилга байгууламжийг барих, шинэчлэх төлөвлөлтийн талаар танилцуулсан юм. Мөн дээрх асуудлууд дээр хийгдэж байгаа менежмент, бага оврын цэвэрлэх байгууламжийн үйл ажиллагаа, түүний онцлог, нийтийн аж ахуйн салбарт нэвтрүүлсэн дэвшилтэт  техник технологи, цэвэр усыг халдваргүйжүүлэх сүүлийн үеийн технологи, улсын болон хотын хэмжээнд 24 цагийн турш цэвэр, бохир усны чанарыг тасралтгүй хянах хяналтын систем зэрэгтэй танилцсан юм.  Мөн Токио BIG SITE-д нийтийн аж ахуйн салбарт үйл ажиллагаа эрхэлж буй 300 орчим компаний үзэсгэлэн яармагийг үзэж сонирхсон нь энэхүү сургалт, семинарын давуу тал болж өгсөн билээ.

Бид энэхүү байгууллагуудын үйл ажиллагаатай танилцсан мэдээлэл, сургалтын явцад таньж мэдсэн техник технологийн танилцуулгыг цувралаар цаашид хүргэх бөгөөд Та бүхнийг уншиж сонирхоно гэдэгт итгэж байна.