Монгол Улсын барилгын салбар үүсч хөгжсөн 85 жилийн түүхт ойг тохиолдуулан  барилгын салбарын нийт ажилтан,  манай орны бүтээн байгуулалтад гар бие оролцон хөдөлмөрлөж байгаа гадаад, дотоодын нийт барилгачид, барилгын салбарын алдар гавьяатан, ахмадууд та бүхэнд чин сэтгэлийн халуун мэндчилгээ дэвшүүлж байна.
   
Монгол Улсын Засгийн газрын үйл ажиллагааны хөтөлбөрт тусгагдсан барилгын салбарын өмнө тавигдаад байгаа зорилтуудыг хэрэгжүүлэхийн тулд тус яамнаас барилгын салбарын хууль, эрх зүйн орчинг боловсронгуй болгох, норм, норматив баримт бичгүүд, стандартуудыг шинэчлэн олон улсын түвшинд хүргэх, барилгын мэргэжилтэй ажилчдыг бэлтгэх, төв орон нутагт барилгын мэргэжлийн сургалт, үйлдвэрлэлийн төвийг олноор байгуулж, материаллаг баазыг бэхжүүлэх, барилгын материалын үндэсний үйлдвэрүүдийг шинээр байгуулах, хөгжүүлэхэд дэмжлэг үзүүлэх, барилга байгууламж, материал, хийц эдлэлийн чанарыг сайжруулж, бат бэх, аюулгүй ажиллагааг хангахад онцгойлон анхаарч байна.

“Орон сууцны тухай хуульд  нэмэлт өөрчлөлт оруулах тухай” хуулийг Улсын Их Хурлаар батлуулж, “Хот, суурины ус хангамж, ариутгах татуургын ашиглалтын тухай” хуулийн шинэчилсэн найруулгыг Улсын Их Хурлаар хэлэлцүүлж,  “Барилгын тухай”, “Хот байгуулалтын тухай” хуулиудад оруулах нэмэлт өөрчлөлт, “Хотыг дахин хөгжүүлэх тухай” хуулийн төслийг боловсруулж байна. Барилгын норм, норматив баримт бичгүүдийг орчин үеийн шаардлагад нийцүүлэн шинэчлэн боловсруулж байна. Стандартчилал, хэмжил зүйн үндэсний зөвлөлийн тогтоолоор “Барилга угсралтын ажилчдын мэргэжлийн үндэсний стандарт”, “Барилгын машин механизмын мэргэжлийн ажилчдын стандарт”-ыг батлуулсан ба “Зураг төсөл, барилгын материалын үйлдвэрийн ажилчдын мэргэжлийн үндэсний стандарт”-ыг батлуулахаар ажиллаж байна.

Монгол Улсын эдийн засаг, нийгмийг хөгжүүлэх зорилтууд, Монгол Улсын Их Хурал, Засгийн газраас дэвшүүлсэн “Шинэ бүтээн байгуулалт” дунд хугацааны зорилтот хөтөлбөрийн хүрээнд өрнөх бүтээн байгуулалтын ажлуудыг үндэсний үйлдвэрийн барилгын материалаар хангах нь манай яамны үндсэн зорилтын нэг болж байна.

Үүнтэй холбогдуулан “Үндэсний үйлдвэрлэлийг дэмжих талаар авах зарим арга хэмжээний тухай” Засгийн газрын 2011 оны 103 дугаар тогтоолоор батлагдсан төрийн болон орон нутгийн өмчийн хөрөнгөөр тэргүүн ээлжинд дотоодын үйлдвэрүүдээс худалдан авах бараа, ажил, үйлчилгээний жагсаалтад барилгын материалын 14 нэр төрлийн бүтээгдэхүүнийг хамрууллаа.

Бүсчилсэн хөгжлийн үзэл баримтлалд тулгуурлан түүхий эдийн нөөц нь судлагдаж, тогтоогдсон орон нутгийн орд газруудыг түшиглэн эхний ээлжинд бүх аймагт барилгын чулуу бутлан ангилах үйлдвэр байгуулж, түүнийг түшиглэн бетон зуурмаг, бетон хийц эдлэлийн үйлдвэр байгуулах, шохойн чулууны ордод түшиглэн цементийн жижиг үйлдвэр байгуулах, дулаан тусгаарлах материалын түүхий эд бүхий аймгуудад эрдэс хөвөн, перлит, алевролит, керамзитийн төрлийн дулаан тусгаарлах материалын үйлдвэр, төмрийн хүдрийн нөөц бүхий аймгуудад ган туйван, металл хийцийн үйлдвэр, төмөр замын шинэ магистрал шугамыг барилгын материалаар хангах зорилгоор Дорноговь, Дорнод аймгуудад дэр бетон, цахилгаан дамжуулах хүчитгэсэн бетон шонгийн үйлдвэр, Улаанбаатар, Дархан болон томоохон бүсийн төвүүдэд Барилгын машин механизм, үйлдвэрийн тоног төхөөрөмжийн засвар, угсралт, сэлбэгийн үйлдвэр, барилгын материалын бөөний худалдааны томоохон сүлжээ байгуулахаар төлөвлөж байна.

    Хөтөлийн “Цемент-Шохой” Хувьцаат компанийн цементийн үйлдвэрийг хуурай аргад шилжүүлэх технологийн шинэчлэлтийн хөрөнгийн асуудлыг шийдвэрлэн барилга угсралтын ажлыг эхлүүлж, Дорноговь аймагт 1.0 сая тонн, Баянхонгор аймагт 50.0 мянган тонн цемент үйлдвэрлэх хүчин чадалтай хуурай аргын үйлдвэрүүдийг байгуулахаар бэлтгэл ажлаа хангаад байна.

    “Хөх ган” ХХК нь Орхон аймагт жилд 30.0 мян.тн төмрийн хүдэр боловсруулан 80-90 хувийн агууламжтай ангижруулсан төмөр үйлдвэрлэх үйлдвэрийг байгуулан үйл ажиллагаагаа эхлээд байна. Дундговь, Говьсүмбэр, Дорнод аймгуудад 4-12 тоннын хүчин чадалтай ган бөмбөлөгийн болон төмөрлөгийн үйлдвэрүүдийг байгуулаад байна.

Барилга байгууламж, материал, хийц эдлэлийн чанарыг сайжруулах үүднээс 6.23 тэрбум төгрөгийн төсөвт өртөгөөр аймгийн төвүүдэд болон нийслэлд барилгын материалын сорил шинжилгээний иж бүрэн лаборитори байгуулах зорилт тавин, Улаанбаатар хотод барилгын материалын сорил шинжилгээний нэгдсэн лабораторийн барилгын ажлыг эхлүүлэн 2013 онд иж бүрнээр нь барьж дуусгахаар төлөвлөж байна.

Монгол Улсын иргэдийг орон сууцжуулах зорилгоор Засгийн газраас баталгаа гарган Монгол Улсын Хөгжлийн банкны  800.0 тэрбум төгрөгийн бондын эх үүсвэрээс жилийн 6 хувиас хэтрүүлэхгүй хүүтэй орон сууцны урт хугацааны, хөнгөлөлтэй зээлийг олгохоор Монгол Улсын Хөгжлийн банк, Монгол банк, Сангийн яамтай хамтран ажиллаж байна.

“Шинэ бүтээн байгуулалт” дунд хугацааны зорилтот хөтөлбөрийн хүрээнд   Буянт-Ухаа, Яармаг, Баянголын ам, 7, 14, Монголын Үндэсний Олон Нийтийн Радио, Телевизийн орчмын болон Ирээдүй орон сууцны хорооллын инженерийн шугам сүлжээ, орон сууц барих ажлуудыг эхлүүлэхээр шийдвэрлээд байна.

Энэ ажлын хүрээнд гадаадын хөнгөлөлттэй зээлийн хөрөнгөөр 7, 14-р хорооло&eum