Ийм янзаар хөгжинө гэж үү?
Монголын барилгын салбар хэсэг уналтанд ороод эргэн сэргэж улс орны өнгө төрхийг илтгэсэн барилга байгууламж сүндэрлэсээр ирсэн билээ. Улс орны өнгө төрх өнгөжин сүр орж байгаад талархах нь зүйтэй ч шүүмжлэхгүй өнгөрч боломгүй асуудал гарсаар л байна.
Аливаа зүйл алдаа оноотой байдаг ч барилга гэдэг “Эмч” -тэй адил алдах эрхгүй. Учир нь түүн дотор хэдэн зуун хүний амь амьдрал байгаа учраас тэр. Гэвч барилгын салбарт үйл ажиллагаа явуулж байгаа байгууллагууд хариуцлагаа ухамсарлаагүй үйлдлийг гаргасаар л байна.
Баригдаж дуусаагүй байхдаа нурж байгаа барилга баригдаж дууссаны дараа хэр удаан настай, ямархуу чанартай байх нь хүний нүдэнд илхэн. Барилгын чанарыг сайжруулах хэрэгтэй гэж элдэв хууль тогтоомж баталж байх хооронд баригдаж байгаа барилгууд нь нурж унаад байх уу? Энэ зурагнаас харахад ярих биш хийж хэрэгжүүлж эхлэх цаг болсоныг сануулаад байх шиг.
Тэр компанийн тийм барилга чанарын шаардлага хангаагүй, мэргэжлийн хяналт хүлээж аваагүй гэдэг боловч иргэд аль хэдийн орчихсон байдаг нь иргэд чанаргүй барилга баригч компаниудыг өөхшүүлж байгаа нэг үйлдэл гэж хэлж болох юм. Та бидний аюулгүй тайван амьдрах орчин нөхцлөө сонгохдоо хариуцлагатай байж худлаа рекламдсан хуурамч сайхан үгэнд хууртахгүй байх хэрэгтэй гэдгийг сануулах нь илүүц биз.