Бүгд Найрамдах Итали Улсын Ерөнхийлөгч Ж.Наполитаногийн урилгаар тус улсад албан ёсны айлчлал хийж буй Монгол Улсын Ерөнхийлөгч Ц.Элбэгдоржийн айлчлал Италийн Ром хотоос эхэллээ. Ерөнхийлөгч Ц.Элбэгдорж өнөөдөр Ватикан Улсад зочилж, Ромын Пап Гэгээн хутагт XVI Бенедикттэй уулзав. 

Манай хоёр улсын харилцаа эртний түүхтэй болохыг  Ромын Папын элч Плано Карпини, Хубилай хааны дэргэд 17 жил албан хаасан Марко Поло нарын бичиж үлдээсэн дурсамж, бичвэрүүд нотолдог.

Ерөнхийлөгч Ц.Элбэгдорж дэлхий нийтийн энх тайван, хүмүүнлэгийн үйлсэд оруулж буй Гэгээн хутагтын үйл хэргийн төлөө талархаж байна гээд шашин хоорондын яриа хэлцээ нь хүн төрөлхтний нийтлэг эрх ашгийн төлөө хамтран ажиллах чухал арга хэрэгсэл юм гэлээ.

Ромын Пап Гэгээн хутагт  XVI Бенедикт Монгол Улсын Ерөнхийлөгчийг Итали Улсад айлчлах үеэрээ Ватикан хот улсад зочлон ирж буйд талархлаа илэрхийлээд  хүний эрхийг хамгаалахын төлөө гаргаж буй санаачилгуудад нь баяр хүргэж байна гэв.

Ерөнхийлөгч болон Ромын Пап Гэгээн хутагт XVI Бенедикт нар дэлхийн уур амьсгалын өөрчлөлтийн эсрэг тэмцэх, байгаль орчныг хамгаалах, ядуурал, хүнсний хомсдолыг бууруулах, аливаа сөргөлдөөнийг энхийн замаар шийдвэрлэх зэрэг асуудлаар санал солилцлоо.

Ватиканы номын сан болон нууц архивт хадгалагдаж буй зарим баримт бичиг, түүхэн эх сурвалжууд, мөн сүүлийн үед олдож байгаа Ромын эзэнт гүрний үед хамаарах түүх, соёлын үнэт өвүүдийг хамтран судлах хүсэлтэй байгаагаа Ерөнхийлөгч Ц.Элбэгдорж илэрхийлсэн. Монголын эрдэмтэн Ш.Бира, Д.Цэдэнсодном нар 2001 онд Ватиканы номын сан, нууц архивт ажиллаж, судалгаа хийж байжээ. Ерөнхийлөгчийн энэхүү хүсэлтийг хүлээн авч байгаагаа Гэгээн хутагт илэрхийлэв.

Уулзалтын үеэр мөн латин хэлтэй судлаач бэлтгэх чиглэлээр Монгол, Ватикан хамтран  ажиллахаар боллоо.

Уулзалтад Монголын Бурхан шашинтны төв, Гандантэгчинлэн хийдийн тэргүүн, хамба Д.Чойжамц оролцов.

Дараа нь Ерөнхийлөгч Ц.Элбэгдорж Ватикан Улсын Их хамба Т.Бертонитой уулзлаа. Их хамба нь Ватикан Улсын Ерөнхий сайд гэсэн үг.

Ватикан Улс Монголд тохиолдсон байгалийн бэрхшээлийг даван туулахад болон  нийгмийн эмзэг хэсгийнхэнд хүмүүнлэгийн тусламж үзүүлж ирсэнд Ерөнхийлөгч Ц.Элбэгдорж талархав. Ватикан нь 1993 онд манай улсад хүмүүнлэгийн тусламж болгон эм, эмнэлгийн материал, 1996 онд 30 гаруй мянган долларын буцалтгүй тусламж олгож байжээ. Мөн 2000 оны өвлийн зудын хохирлыг арилгахад зориулж Ромын Пап Гэгээн хутагт II Ион Павелл хувиасаа болон Ватиканы хүмүүнлэгийн “Кор Унум” байгууллага тус тус тусламж үзүүлсэн юм.

Ватикан Улс манай төрийн албан хаагчдын мэргэжлийг дээшлүүлэхэд дэмжлэг үзүүлж байсан. Энэ удаад Монголын зүгээс эрдэмтэн, судлаачдын баг гаргаж Ватиканд ажиллуулах талаар харилцан ярилцлаа.

Мөн эрүүл мэндийн салбарт хамтын ажиллагаа идэвхтэй хөгжих бололцоотой талаар ярилцав.

Ерөнхийлөгч Ц.Элбэгдорж Ромын Пап Гэгээн хутагт XVI Бенедиктийг тааламжтай цагтаа Монголд айлчлахыг урилаа.

Ватикан хот улс нь Католик сүмийн тэргүүн, Гэгээн Хутагт Ромын Пап болон түүний департамент байрлаж, шашин номлолын үйл ажиллагаа явуулдаг засаг захиргааны төв юм. Монгол Улсад хөдөө аж ахуй, боловсрол, нийгмийн халамжийн чиглэлээр 20 гаруй төсөл хэрэгжүүлжээ.

Эх сурвалж: www.president.mn