Энэ жил Барилгын салбарынхан 85 жилийнхээ түүхэн босгыг алхсан бол өнөөдөр Монголын Архитектурын Эвлэл үүсэн байгуулагдсаныхаа 55 жилийн баярын хурлыг хийлээ.

Монгол Улсад зам тээвэр, харилцаа холбоо, инженерийн хангамжтай барилга байгууламж бүхий хот сууринг барих их бүтээн байгуулалтын ажлыг эхлүүлсэн тэртээ 1921 онд орчин үеийн архитектур үүсэх эхлэл болсон юм.

     Монголын хамгийн анхны архитектор Б. Чимэд, Б. Дамбийням, А. Хишигт нарын санаачлагаар 1956 онд Монголын Урчуудын эвлэлийн дэргэд архитектор, инженер, зургийн техникч, урчуудаас бүрдсэн 31 хүнтэй “Барилга ба барилгын урлагчын бүлэг” байгууллагдаж даргаар нь Б. Чимэдийг сонгосон тэр үеэс Монголын Архитектурын Эвлэлийн хөгжлийн үндэс суурь нь тавигджээ.

    Баярын хурлыг МАЭ-ийн ерөнхийлөгч Э.Хүрэлбаатар нээж, нийт архитекторууддаа мэндчилгээ дэвшүүлэн, ажлын амжилт хүссэн юм. Үүний дараа МАЭ-ийн үүсэн байгууллагдсан түүхэн замналыг харуулсан баримтат киног хуралд хүрэлцэн ирсэн зочдод үзүүллээ.

    Энэхүү түүхэн баримтат киног үзсэн хэн бүхэнд эх орны хөгжлийг илтгэх сүрлэг сайхан барилгыг бүтээн босгохын төлөө барилгачидтайгаа мөр зэрэг тэмүүлэх архитекторуудаараа бахархах сэтгэл өөрийн эрхгүй төрөх байсан бизээ.

      МАЭ-ийн 55 жилийн баярын хуралд ГХБГЗЗГ-ын дарга Ц. Ганхүү, УИХ-ын даргын зөвлөх н.Батмөнх, Нийслэлийн Засаг даргын зөвлөх Баатарзориг, ШУА дэд ерөнхийлөгч Дорж, МБХ-ын ерөнхийлөгч М. Батбаатар, МБИХ-ын ерөнхийлөгч Ганзориг, МББМҮХ-ын ерөнхийлөгч Лхагвадорж нар хүрэлцэн ирж, мэндчилгээ дэвшүүллээ. Мөн ЗТБХБЯ-ны сайд Х. Баттулга, УИХ-ын дарга Д. Дэмбэрэл нарын архитекторуудад илгээсэн мэндчилгээг бие төлөөлөгч нар нь дамжуулж ажлын амжилт хүслээ.

Архитекторуудын баяр дээр МУГЖ Д. Сосорбарам “Үлэмжийн чанар”- аараа сэтгэлийн утсыг хөндөж, уран бүтээлийн онгодыг нь хөглөлөө.

    Дархан хүн бурхан ухаантай гэдэг шиг Архитектор бол Бурхантай ухаантай хүмүүс юм. Хийсэн бүтээлтэй түүгээрээ омог бардам байдаг Монголын нийт архитекторууддаа “Барилга.МН” БЗМТөвийн хамт олны өмнөөс түүхт 55 жилийн мэнд дэвшүүлж, ухаан хурц, мэлмий нь тунгалаг байх болтугай гэсэн ерөөлийг дэвшүүлье.