Хан-Уул дүүргийн нэгдүгээр хороо 120 мянгатын автобусны буудлын ойролцоо өнгөрсөн дөрөвдүгээр сард “Алтай

констракшн” компани орон сууц барих ажлаа эхлүүлсэн билээ. Уг ажлыг тус хорооны оршин суугчид эсэргүүцсэний дүнд хотын дарга уг барилгын ажлыг зогсоож, газрын зөвшөөрлийг нь цуцалсан юм.

Иймд “Алтай констракшн” компани нэхэмжлэл гаргаж, хотын даргыг шүүхэд дуудаад буй. Шүүх хурал өнөөдөр 14.00 цагт товлогдсон ч дахин долоо хоногоор хойшиллоо. Хуралд хариуцагчийн талаас Улаанбаатар хотын Газрын албаны дэд дарга Н.Ариунгэрэл, Газрын албаны шүүхийн мэргэжилтэн С.Энхжаргал, нэхэмжлэгчийн зүгээс “Алтай констракшн” ХХК-ийн гүйцэтгэх захирал Д.Батбаасан, шүүгчээр Э.Лхагвасүрэн, Ц.Сайхантуяа, Д.Эрдэнэчимэг, иргэдийн төлөөлөгчөөр Д.Байдраг нар оролцсон юм. Хурлын дараа Д.Байдрагаас зарим зүйлийг тодруулав.

-Шүүх хурал яагаад хойшлов?
-Гурван үндэслэлээр хойшиллоо. Нэгдүгээрт, 2005 онд тус компанид олгосон 4000 метр квадрат, 2010 онд олгосон 5000 метр квадрат газрыг олгосон нь хууль зүйн үндэсгүй гэдгийг нотлуулах хэрэгтэй. Мөн Нийслэлд газар олголт хийхдээ тухайн дүүргийн Засаг даргын саналыг авах ёстой байдаг.

Үүнийг авсан эсэхийг тодруулж өгөөч гэдэг хүсэлтийг тавиад байна. Шүүх бидний тавьсан асуудлын хүрээнд дүүргийн Засаг даргад хандахаар болсон.

Хоёрдугаарт, Газар төлөвлөлтийн төлөвлөгөөг дүүргийн Засаг даргаар батлуулж байж дараагийн ажлууд хийгддэг. Гэтэл энэ барилгыг барих зөвшөврлийг урьдчилан төлөвлөсөн байсан эсэхийг мэдэхгүй. Тиймээс дүүргийн иргэдийн хурлын төлөөлөгчдеөс тодруулах шаардлагатай.

Гуравдугаарт, Нэхэмжлэгч “Алтай констракш” 2005 онд Хан-Уул дүүрэгт мах, сүү, ногоо зардаг 60 метр квадрат газартай ТҮЦ-ийг худалдаж авсан, Тэгээд тухайн газрыг өөрийн нэр дээр болгохдоо хэмжээг нь 4000 болгосон байгаа юм. Тэгэхээр энэ газрыг ямар эрх зүйн үндэслэлээр томруулаад авчихав гэдэг, асуудал гарч ирж байгаа.

Тиймээс тус компанийг 60 метр квадрат газраа яаж яваад, ямар замаар 4000 болгов гэдгээ нотлох баримттайгаар гаргаж ирэх гэсэн үндэслэлээр хойшлоод байна.

-Тав дахь удаагаа хойшилж байна?
-Хариуцагч тал нотлох баримтаа гаргаж өгөхгүй удах, гуравдагч этгээд хууль зүйн туслалцаа буюу өмгөөлөгч авах, хариуцагч талаас хүндэтгэх шалтгаан гарах гэх мэт олон шалтгаанаар хойшилсоор өнөөдрийг хүрч байна. “Алтай констракшн”-ий нэхэмжлэлийн дагуу явагдаад байгаа нь хууль бус.

Ард иргэдийн эрх ашиг, монгол хүний эрүүл аюулгүй орчинд амьдрах эрх гэх мэт үндсэн хуулиар олгогдсон эрхийг тус компани зөрчиж, үл ойшоож байгаа юм.

-Гуравдагч этгээд гэдэг нь ямар хууль эрхзүйн үндэстэй субъект вэ?
-Өнгөрсөн дөрөвдүгээр сараас эхлэн “Алтай констракш”-ны нэхэмжлэлтэй Хотын даргад холбогдох шүүх хурал болж байна. Хан-Уул дүүргийн иргэдийг төлөөлж, иргэдийн эрх ашиг хөндөгдөж байна гэдэг утгаар гуравдагч этгээдийн үүрэгтэйгээр оролцож байна. Бидний 34 иргэн итгэмжлэгдсэн төлөөлөгчөөр явж байгаа.

-120 мянгатын иргэд нэгдэн тэмцэж байж барилгын ажлыг болиулсан. Одоо ямар арга хэмжээ авч байгаа вэ?
-Анх барилга барьж эхлэх үеэс л зохион байгуулалтад орж тэмцсээр ирсэн. Тэгээд Хотын дарга уг шийдвэрийг цуцалж, барилгын ажлыг болиулаад байсан юм. Гэтэл “Алтай констракшн” ХХК бүдүүн зүрх гаргаж, түүнийг шүүхэд өгөөд байна. гэхдээ иргэдийн зүгээс асуудал бидний талд шийдэгдтэл явах болно.

-”Алтай констракшн” ХХК зарга хийгээд байгаа нь хэр үндэслэлтэй юм бол?
-Энэ компани даварна гэхэд арай дэндэж байна. Хотын даргын шийдвэр иргэдийн эрх ашгийг бодсон хэрэг байсан. Гэтэл тэд зүгээр л алга дарамхан газарт шунаад, бүр ичихгүй өнөөдөр Хотын даргатайгаа заргалдаад явж байна шүү дээ.

-Хотын дарга заргаа авах магадлал хэр байна?
-”Алтай констракшн” компани Хан-уул дүүргийн газрыг аваад дуусч байгаа. Гэтэл га хүрэхгүй ногоон байгууламжид зарга хийгээд яваад байгаа нь үнэхээр ичгэвтэр хэрэг. Тухайбал, “Нархан” хотхон гээд бүхэл бүтэн хороолол байна. Драмын театрын хажууд өөрийнхөө оффисыг мөн л ногоон байгууламж дээр барьсан, цаана нь “Элит” орон сууц гээд байна.

Тэр ч бүү хэл Монгол Улсын онцгой бүс болох Төв шуудан дотор “Экспресс” товер гээд салбараа барьчихаад байна. “Алтай констракшн” бол ийм л даварсан компани. Хэрвээ энэ компани мөнгөөр далайлгадаггүй л юм бол бид заргаа авна.

Эх сурвалж: “Нийслэл таймс”