“Хүмүүс л хог хаяад байдаг” гэж ирээд албан тушаалтнууд ярина. Мэдээж хүмүүс хог хаяад байгаа нь үнэн ч тохижилт сайтай, цэвэрхэн орчинд хүн хог цацаад явах нь юу л бол. Тиймээс “Цэвэр орчинд амьдарцгаая” аяныхаа хүрээнд бид дүүргүүдийн тохижилтын ажилтай танилцуулж байна.

Бид “Дүүргүүд тохижилтонд зориулсан тэрбум төгрөгөө юунд зарцуулав” гэх асуултанд хариулт авахаар хотын төвийг хамарсан дүүргүүдийн Үйлдвэрлэл үйлчилгээний хэлтсийн дарга нартай ярилцсан юм. Эхний ээлжинд бид Сүхбаатар дүүргийг танилцуулж байна.

СБД-ийн хувьд нийтийн эзэмшлийн зам талбайн 40 гаруй гудамж байдаг нь бусад дүүргийг бодвол харьцангуй өндөр тоо юм.

УИД-ийн өмнөх Цэрэндоржийн гудамжны тохижилтын ажлын хүрээнд 4000 м2 байгалийн чулуун хавтангаар голын хэсгийг, 2000 гаруй м2 зүлэг ногоон байгууламж хийж, 30 гаруй гэрэлтүүлэг, Монгол улсад нэлээн томоохонд тооцогдох хэмжээний 6х27 метрийн урттай аялгуут усан оргилуур хийсэн гэлээ. Энэ бүхэнд нийт 500 гаруй сая төгрөг зарцуулж, Экспресс зам компани гүйцэтгэлийг нь хийжээ.

Мөн Засгийн газрын ордны хойд хэсгийн 2500 гаруй м2 талбайг орчин үеийн шийдэлтэй байгалийн чулуу дэвсэж,  зүлэгжүүлэхэд 100 гаруй сая төгрөгийг зарцуулжээ.

Тус дүүргийн нутаг дэвсгэр 5-р хороонд орших 6, 43-р байрны дунд хорооллын доторх бичил тохижилтыг 50-иад сая төгрөгөөр хийжээ. Оршин суугчид энэ ажилд сэтгэл дүүрэн байгаагаа илэрхийлж байлаа. Биднийг очих үед гэрлүүдийг суурилуулж дуусаагүй байсан юм.


Үүнээс гадна НҮБ-ын гудамжийг иж бүрэн янзалсан, явган зам авто зам, авто замын хашлагыг сольсон, Засгийн газрын ордны зүүн талыг тохижуулсан, Боловсролын их сургуулийн урд талын нүхэн гарцнаас гараад ирэнгүүт байдаг бохир хэсгийг тохижуулсан гээд олон ажил дурьдлаа.

Хотын төвийн хэсгийг хамардаг тус дүүргийн хувьд энэ жил 200 гаруй хогийн сав шинэчилж тавиад хотын төвийг хамарсан хэсэгт 800 гаруй хогийн сав байгаа гэлээ. “Хогийн савыг нөхөж сэлбэх шаардлага маш их байдаг.  Хүмүүс сүйтгэдэг, машин мөргөчихдөг гээд бэрхшээл мундахгүй” гэж СБД-ийн Үйлдвэрлэл үйлчилгээний хэлтсийн дарга Б.Батдэлгэр ярьсан юм. Стандартын дагуу бол 40-50 метр тутамд хогийн сав тавих ёстой гэдгийг энд сануулах нь зүй.
Харин бидний сурвалжлагаараа хөндсөн Багшийн дээдийн гэх автобусны буудлын тохижилтыг 29-ний өдөр дуусгаж, хүлээлгэн өгөх ажээ.

Хамгийн их хэл ам таталдаг зуун айлын орчмыг асуухад:
-Том жижиг нийлээд 10 гаруй мянган хүний бизнесийн үйл ажиллагаа тэнд явагдаж байдаг. Зуун айл гэхдээ барилгажиж байгаа. Хүндрэлтэй байна, хог их гарч байна гээд иргэдийнхээ бизнесийг зогсоох үйл ажиллагаа явуулна гэдэг төрийн зүгээс тийм ч зохимжтой арга хэмжээ биш. Хаалаа гэхэд барилгын матералын шаардлага хангасан захыг нь бэлтгэж өгөөгүй байж болохгүй л дээ. Ер нь зуун айлын орчим барилгажиж, сүүлийн үед харьцангуй гайгүй болж байгаа гэдгийг дурьдах хэрэгтэй. Яваандаа сайжирна. Энэ бол цаг хугацааны асуудал.

Харин ИБМУТ-ийн хувьд Засгийн газрын түвшинд яармаг руу шилжүүлэх эсэх асуудлыг ярьж буй юм билээ. Энэ асуудлыг төр шийдэх байх. Дүүрэг дангаараа шийдчих хэмжээний асуудал биш гэлээ.

Сүхбаатар дүүрэг энэ жилийн хувьд хийсэн тохижилтын ажлыг ийнхүү цухас дурьдлаа. Дараагийн ээлжинд бид Чингэлтэй дүүрэг нэг тэрбум төгрөгөөрөө ямар тохижилтын ажил хийснийг та бүхэнд үзүүлэх болно.