Нийслэлийн өдрийн өмнө хотын удирдлагууд Улаанбаатар хотоос УИХ-д  сонгогдсон гишүүдээ урьж уулзан, энэ онд хийж хэрэгжүүлсэн ажлаа тайлагнаж, цаашид хийхээр төлөвлөсөн ажлууддаа дэмжлэг хүслээ. 

Монгол улсын төсөв 6 их наяд хүрч байгаа бол нийслэл хот 160 гаруй тэр бум төгрөгний л эрх мэдэлтэй. Монгол улсын хүн амын тал шахам хувь нь оршин суудаг ч бүтээн байгуулалт, хөрөнгө оруулалт, урсгал зардалдаа төсвийн гуравхан хувийг авч байгаа нь чамлалттай тоо юм. Авто зам, агаарын бохирдол, нийтийн тээвэр, авто замын ачаалал, хөрсний бохирдол, хүн амын нягтрал, сургууль цэцэрлэг, эмнэлэгийн хүрэлцээ гээд шийдвэрлэх олон асуудал бий. Гэвч энэ бүгдийг шийдэхийн тулд өнөөдөр авч байгаа төсөв хаанаа ч хүрэхгүй нь ойлгомжтой. 

Гэхдээ л хотын удирдлагын хувьд байгаа жаахнаа хүргэж, бас ч үгүй нийслэлийн өнгө төрхөд өөрчлөлт оруулж байгаад гишүүд талархалтай хандаж байна. 

             УИХ-ын 76 гишүүний 20 нь хотоос сонгогдсон. Үнэхээр хотод асуудал их байгаа ч дийлэнх гишүүд нь хөдөө орон нутгаас сонгогдсон болохоор тэндээ төсөв хуваарилуулах гэж зүтгэдэг. Хоёр мянган хүнтэй суманд хоёр сургууль байхад 20 мянган хүнтэй хороонд ганц ч сургууль цэцэрлэг байхгүй байгаа нь хуваарилалт буруу байгааг илтгэж байгаад гишүүд санал нэгдэж байна. Үнэхээр хотоо хөгжүүлж өнгө төрхийг нь сэргээн, бүтээн байгуулалтыг хийе гэвэл төсөвт хотоос татаас авдаг бус орлого дээр нь нэмж төсөв хуваарилах шаардлагатай юм. Сүүлийн гурван жилийн хугацаанд гэхэд л нийслэлийн хүн ам 100 мянгаар нэмэгджээ. Үүнийг дагаад ажлын ачаалал, төсвийн зарлага улам бүр нэмэгдэж байна. Гэхдээ асуудлыг шийдвэрлэх гарц байгаа. Эхний ээлжинд нийслэлийн эрхзүйн байдлын тухай, төсвийн тухай, хотыг дахин хөгжүүлэх тухай хуулиудыг баталж өгвөл хот ачааллаа шингээх эрх зүйн орчин бүрдэнэ гэдгийг нийслэлийн Засаг дарга онцолсон. Хотын иргэдээс сонгогдсон гишүүдийн хувьд ч бүрэн дэмжин ажиллахаа илэрхийлсэн юм.

Төсөв багатай, хийх ажил ихтэй нийслэл хотод зориулагдсан төсөв хөрөнгийг нэмэгдүүлэхэд гишүүд дэмжлэг үзүүлэхээ амлаж, хотын удирдлагуудын гаргаж байгаа шийдвэр, хийж хэрэгжүүлж байгаа ажилд онц сайн үнэлгээ өглөө.