“Оюутан борлуулагч- 2” шоу амжилттай болж өнгөрлөө
Оюутан залуусын чөлөөт цагийг зөв боловсон өнгөрөөх, тэдэнд тулгардаг хамгийн гол бэрхшээл болох санхүүгийн асуудлыг шийдвэрлэх зорилготой зохион байгуулдаг “Оюутан борлуулагч” шоуг 2 дахь жилдээ “Барилга.МН” БЗМТ-өөс амжилттай зохион байгуулж дүнгээ гаргалаа.
Жил ирэх бүр шоунд оролцох багуудын тоо нэмэгдэж байгаа бөгөөд МУИС, ШУТИС, СЭЗД сургуульд Эдийн засаг, дизайны чиглэлээр суралцдаг оюутнууд баг бүрдүүлэн нийт 10 баг оролцлоо. “Оюутан борлуулагч” -2 шоуг 7 хоногийн хугацаатай зарласан юм. Шоунд оролцож байгаа оюутнууд ихэвчлэн санхүү, эдийн засгийн чиглэлээр суралцдаг оюутнууд байсан учир багууд өөрсдийн гэсэн маркетинг боловсруулан оролцсон нь багуудын өрсөлдөөнийг улам хүчтэй болгох нэг хөшүүрэг болсон юм.
Шоу нь богино хугацаанд зарлагдсан учир хамгийн сайн маркетинг боловсруулж, өөрсдийн эзэмшиж байгаа мэргэжилийнхээ давуу талыг ашиглаж, зорилтот хэрэглэгчээ зөв тодорхойлж, эрэлт хэрэгцээг нь зөв мэдэрч чадсан баг нь энэ шоуны ялагчаар тодорлоо.
“Оюутан борлуулагч”-2 шоуны тэргүүн байрыг ШУТИС, ҮТДС-ийн “Тейлор” баг эзэлсэн бол Удаах байрыг МУИС, ЭЗС- ийн “Education house”, Гуравдугаар байрыг МУИС-ын “Соронз” багийн оюутнууд эзэллээ.
Эдгээр багууддаа баяр хүргэхийн ялдамд сурлага хөдөлмөрийн өндөр амжилт хүсье.