Хог шороо, утаа униар гээд мундахгүй олон асуудлын эзэн нь гэр хороолол гэхэд буруудахгүй.

Байдаг бүх л муу муухайг гэр хороолол руу чихдэг нь гэм биш зан. Тэгвэл тэдэнд бас том асуудал байдаг юм шүү. Энэ бүгдийг дурьдаад байвал ер нь мундахгүй олон. "Ертөнцийн гурван хэцүүгийн нэг юу вэ" гэвэл "Гэр хорооллын хэцүү олон" гэхээр. Хотын төвөөр дуу хангинуулан давхиад байдаг хогийн машин хаана байна вэ. Гэр хороололд хог ачих машин ирнэ гэдэг нүдний гэм.

Ирсэн ч хог ачих биш, асгачихав уу л гэмээр болгож орхино. Тоосжилт ихтэй гэгддэг гэр хороолол ингэж нэг муу нэр авна. Ажлаа тараад гэртээ харихаар явахад гэрэлтүүлэг гэж байхгүй. Таг харанхуй гудамжаар урдах замаа олж ядан гэлдрэх нь бас нэг хэцүү. Хотын гэрэлтүүлэг гээд багагүй мөнгө зарцуулдаг хэрнээ гэр хороолол нь таг харанхуй.

Олон жилийн өмнө хуучин хэдэн гэрэл тавьсан ч тэр гэрэл нь одоо асах нь байтугай хагарсан шилний үйрмэггүй болчихсон. Гэмт хэрэг, тэр дундаа дээрэм тонуул, хулгай гээд хэргийн эх сэжүүр нь гэрэлтүүлэг муутайгаас болж байгаа. Харин айл өрхийн гэрэл цахилгааны хувьд мөн л адил лааны гэрэлд амьдралаа залгуулсаар л байна.

Орон нутгаас шинээр айл нүүж ирэхэд бүртгэлгүй, харьяалалгүй гэсэн олон шалтгаанаар цахилгаан залгана гэж байхгүй. Ингээд л чирэгдэл учруулж эхэлнэ дээ. Цахилгааны утас, холболтын хураамж гэж нэлээд их мөнгө зарцуулна.

Уг нь "Цахилгааны утас нь төслийнх тул ард иргэдэд үнэ төлбөргүй өгнө" гэж байсан. Харин энэ бүгдийг хэлэхэд "Тэр төсөл чинь хэрэгжихээсээ өнгөрсөн" гээд утсаа хураагаад авах жишээтэй. Ингэж нэг юм тогны бараа харна шүү дээ. Хэцүү гэхэд нэлээдгүй тарчиг энэ гэр хорооллыг одоо бас нэг зовоогчтой болгочихлоо.

Тэр нь хараахан харагдаж үзэгдээгүй утааны байцаагч юм. Нөгөө утаа бага гаргадаг шинэ зуухгүй л бол гэр хорооллынхон тэгээд золигт гарах нь тэр дээ. Гэхдээ тэр зуух нь бас асуудалтай. Төрөөс ихэнх мөнгийг нь төлөх ч гэлээ асааж суртлаа л үйлээ үзнэ.

Бас болоогүй, нүүрсийг асгах нь холгүй түлдэг байсан бол одоо долоо хэмжиж, нэг түлэх арга ухаанд сурах шаардлагатай болчихоод байна. Ер нь хэцүү бүхэн гэр хороололд байсаар л байна. "Гэр хорооллын хэцүү олон" гэж.