Газрын ээлжит дуудлага худалдаа өчигдөр Нийслэлийн газрын албаны байранд нээлттэй боллоо.

Сонгинохайрхан, Хан-Уул, Баянзүрх, Баянгол дүүргийн нутагт нийт есөн байршилд газар эзэмших, ашиглах эрхийн дуудлага худалдааг хотын даргын захирамжийн дагуу зарлажээ.

Бүртгэлийн хайрцгийг нээхэд Сонгинохайрхан, Хан-Уул, Баянзүрх дүүргийн долоон байршлын газарт дуудлага худалдааны санал ирээгүй аж. Нэг байршилд нэг компани санал ирүүлсэн тул өрсөлдөгчгүй гэсэн шалтгаанаар дуудлага худалдааг буцаалаа.

Харин Баянгол дүүргийн 20 дугаар хороо "Флайвүүд" компанийн хойд талд үйлдвэр, үйлчилгээний зориулалттай 0.08 га газрыг дуудлагаар худалдахаар болсон юм. Энэ газарт гурван иргэн өрсөлдөхөөр саналаа ирүүлжээ.

Дуудлага худалдааны анхны үнэ 18 сая 780 мянган төгрөг. Дуудлага худалдааны үнийг хамгийн багадаа 100 мянган төгрөгөөр өсгөх дүрэмтэй юм байна. 0.08 га газрын төлөө гурван иргэн өрсөлдөж 21 сая 500 мянган төгрөгөөр иргэн н.Батзориг дуудлага худалдааны ялагч боллоо.

Тэрээр 14 хоногийн хугацаанд Нийслэлийн газрын албаны дансанд мөнгөө тушааснаар газраа өөрийнх болгох юм байна.