Их Монгол улс байгуулагдсан 1206 оныг билэгшээн 2000 оны 12 сарын 06-ны өдөр одоогийн Ардчилсан намыг МҮАН, МСДН зэргийн 5 нам нэгдэн байгуулсан билээ.  Энэ өдрийг сонгон Дуурь бүжгийн эрдмийн театрын зэргэлдээ хойно байх Ардчилсан намын байрны суурин дээр баригдах “Ардчиллын өргөө”-ний шав тавих ёслол болов.

 

Ардчиллын өргөө цогцолборыг Ардчилсан хувьсгалын 20 жилийн ойд зориулан 20 давхар байхаар төлөвлөж, ордоны барилгын зураг төслийн уралдаанд шалгарсан загвараар барихаар болсон аж.

 

Зураг төслийн "Baldan’s" ХХК-ийн бүтээл “Ардчиллын өргөө”-ний шилдэг зураг төслийн уралдаанд шалгарсан байна. Ардчиллын өргөөг 20 давхар 27,780 м2 талбайтай байхаар зураг төслийг шийдсэн байна. Цогцолбор барилга нь А, Б гэсэн үндсэн 2 блокоос бүрдэх бөгөөд олон нийтийн хэсэг нь 5 давхар, 20 давхар офисийн цамхаг нь 120 метр өндөр, техникийн давхар, хүндэтгэлийн “Пирамид” танхимаар төгсөх аж.

 

 

Шав тавих ёслолд Ардчилсан намын дарга Н.Алтанхуяг, УИХ-ын дэд дарга Г.Батхүү, генсек Д.Эрдэнэбат, УИХ дахь тус намын гишүүд, Ардчилсан намын ҮЗХ-ын гишүүд, Дүүргийн АН-ын дарга нар болон гишүүд дэмжигчид оролцжээ. Ардчилсан намын дарга Н.Алтанхуяг шав тавих ёслол дээр хэлсэн үгэндээ “Ардчиллын өргөө бол олон нийтэд нээлттэй байх бөгөөд Ард түмний өргөө байх болно” гэж цохон дурьдав.