Улсынхаа нутаг дэвсгэрийг бүрэн бүтэн, эзэнтэй байлгах нь төрийн хамгийн тэргүүн зорилт байдаг билээ. Тэгвэл энэ ажлын хамгийн хүндийг нь нуруундаа үүрч байгаа гэж хэлж болох ЗТБХБЯ-наас салбартаа гадаадаас хөрөнгө оруулалт дэвшилтэт технологи оруулж ирэх, хамтын ажиллагааг хөгжүүлэх зорилгоор"Хот байгуулалтын ажлын хэсэг" байгуулан ажиллаж байна. Салбарын сайд Х.Баттулгаар ахлуулсан энэхүү ажлын хэсгийн ээлжит уулзалт өчигдөр ЗТБХБЯ-нд боллоо. Уулзалтад ХБНГУ-аас Монгол Улсад суух Онц бөгөөд Бүрэн эрхт Элчин сайд Пиус Фишер тэргүүтэй Германы бизнесийн байгууллагын төлөөлөгчдөөс гадна, энэ салбарт манай улстай нягт хамтран ажилладаг БНСУ-ын Койка, Японы Жайка зэрэг байгууллагын ажилтнууд уригдан оролцсон юм.

Засгийн газраас дэвшүүлсэн "Шинэ бүтээн байгуулалт" хөтөлбөрийн хүрээнд Барилга хот байгуулалтын салбарыг хөгжүүлэхэд гадны хөрөнгө оруулагчдын үүрэг чухал байдгийг Х.Баттулга сайд уулзалтын эхэнд онцлоод, энэ харилцаа цаашид өргөжин хөгжинө гэдэгт найдаж байгаагаа хэлсэн. Мөн хөрөнгө оруулалт гэхээсээ илүү өндөр технологи оруулж ирэхийг чухалчлах болно гэж дурьдаж байлаа. Зам тээвэр барилга хот байгуулалтын яамны зүгээс

орон сууцны VII хорооллыг барих ажлыг эхлүүлээд байгаа бөгөөд Яармаг, Буянт-Ухаа, МҮОНРТ орчмыг барилгажуулах ажлыг ажлыг нэн даруй эхлүүлэхээр чармайн ажиллаж байгаа юм байна. Дээр дурьдсан газруудад 16 мянган айлын орон сууц барих аж. Хөрөнгө  оруулагчдын зүгээс шинээр баригдах орон сууцыг иргэдийн худалдан авах чадварт хэрхэн тохируулах талаар ихээхэн сонирхож байсан бөгөөд ажлын хэсгийнхэн "Барилгын  компаниудын боловсон хүчинг газраа худалдсан иргэдээс бүрдүүлэх, барилгын материалыг дотоод-доо үйлдвэрлэх замаар өртгийг багасгах боломжтой" гэсэн хариулт өгч байв. Хот иргэншилтэй тэдэнд сумдыг хөгжүүлэх хөтөлбөр ихээхэн сонирхолтой байгаа нь илт байсан.

Энэ сэдвээр тавигдсан асуултад сайд "Монгол Улс өргөн уудам нутагтай гэдгийг та бүхэн мэднэ. Хүн ам нь уламжлалт мал аж ахуйгаа эрхлэн суудаг учраас төвлөрөх боломжгүй байдаг. Төрийн зүгээс ч амьдралын энэ байдлыг алдагдуулалгүйгээр нийгмийн үйлчилгээг хүргэх бодлого барьдаг юм" гээд "Сумдыг хөгжүүлэх хөтөлбөр"-тэй хамтран ажиллахыг хүссэн. Уулзалтын үер ХБНГУ-аас Монгол Улсад суух Онц бөгөөд Бүрэн эрхт Элчин сайд Пиус Фишерээс цөөн асуултад хариулт авлаа. Түүний ярианаас ХБНГУ бусад улсын нэгэн адил манай улсын уул уурхайн салбарт хөрөнгө оруулах сонирхолтой байгаа гэдэг нь анзаарагдаж байлаа.

-Герман улсаас барилга хот байгуулалтын салбарт ямар шинэ технологи Монгол Улсад оруулж ирэх боломжтой вэ?

-Манай улсын хувьд танай улстай эрчим хүч, хөрөнгийн зах  зээл, уул уурхай гэсэн гурван үндсэн чиглэлээр хамтрах боломжтой гэж үздэг, энэ чиглэлд хөрөнгө оруулах сонирхолтой байдаг.

-Өнгөрсөн жил танай улсын Барилга хот байгуулалтын сайд манай улсад айлчилсан. Тэр үед яригдаж байсан ажлуудаас хэрэгжиж байгаа төсөл байгаа юу?

-Яг одоогийн байдлаар Германы талаас барилга хот байгуулалтын салбарт хийсэн томоохон хөрөнгө оруулалт алга байна. Гэхдээ энэ бод хийхгүй гэсэн үг биш, цаашдаа хамтран ажиллах боломж, бололцоо дүүрэн байгаа. Жишээ нь, Тиесен групп Монголд коксын үйлдвэр байгуулах сонирхолтой. Энэ мэтчилэн Герман-Монголын хамтын үйл ажиллагаа барилга хот байгуулалтын салбарт ч өргөжин хөгжинө гэдэгт итгэлтэй байна.

Эх сурвалж www.vip76.mn