Сэлбэ голыг сэргээх, урсацыг нэмэгдүүлэх ажлыг  энэ онд эхлүүлээд байгаа. Уг ажилд хоёр тэрбум төгрөг зарцуулахаар болсон бөгөөд эхний ээлжинд хотын төв дундуур 1.2 км газарт усны урсгалыг нэмэгдүүлэхээр болсон. Сэлбэ голыг урсацыг нэмэгдүүлж орчныг нь иж бүрэн тохижуулахад нийт таван тэрбум 600 сая төгрөг шаардлагатай ажээ. Харин Сэлбэ голыг сэргээх ажил хэрхэн явагдаж байгаа талаар Сүхбаатар дүүргийн Засаг даргын Тамгын газрын Үйлдвэрлэл үйлчилгээний хэлтсийн дарга Б.Батдэлгэрээс тодруулсан юм.

-Сэлбэ голыг сэргээх ажил эхлээд байна. Өнөөдрийн байдлаар энэхүү ажил хэрхэн явагдаж байна вэ?

-Сэлбийн урсацыг сайжруулах орчин тойрныг нь тохижуулах зорилгоор Сүхбаатар дүүргийн Засаг даргын Тамгын газраас олон ажил зохион байгуулж байна.   Өнгөрсөн тавдугаар сард улс орон даяар мод тарих өдрөөр Сэлбийн эрэг хөвөөгөөр 1000 орчим мод тарьсан. Харин энэ удаад урсацыг нь сайжруулах зорилгоор бетон цутгаж, плёнк дэвсч, томоохон хэмжээний бассейн байгуулахаар болсон. Өөрөөр хэлбэл, Сэлбэ голын эргийн дагуу хөрсний ус их байдаг. Тэр хөрсний усыг ашиглаж  сан байгуулах юм.

-Бассейн нь ямар учиртай юм бэ?

-Тухайн бассейнд цутггасан голын ус хальж цааш урсч байх төлөвлөгөө гаргасан байгаа. Өөрөөр хэлбэл,  Сэлбэ төслийн хувьд экологийн тэнцвэр, орчны тохижилт, бусад орны хотын дундуур урсдаг голуудын жишигт нийцэхүйц байхаар төлөвлөж зураг төслөө гаргасан.  Эхний ээлжинд 100 айлаас Арслантай гүүр хүртэлх хэсгийн урсацыг сайжруулахаар ажиллаж байна.

-Сэлбэ гол дагуу олон айл буусан байдаг. Тэдгээр айлуудыг нүүлгэх үү?

-Энэ бүтээн байгуулалалтын трасст орж байгаа айлуудыг нүүлгэнэ. Түүнчлэн газрын зөвшөөрөлгүй буусан айлуудад  дахин газар олгохгүй байхаар шийдсэн.

-Үүнээс гадна энэ голоор машин их явдаг. Эдгээрт хэрхэн хяналт тавьж байгаа вэ?

-Дарь-Эхийн замыг хааснаас үүдэн Сэлбэ голоор машин явах болсон.  Энэ тал дээр нийслэлийн Мэрэгжлийн хяналт болон манай дүүргийн Байгаль орчин хариуцсан мэргэжилтэн, хорооны холбогдох удирдлагууд хяналт тавьж байгаа.

-Голын урсацыг нэмэгдүүлэх ажил хэзээ дуусах бол?

-Ямар ч байсан ажил эхлээд удаагүй байна. Энэ ажил дээр ОХУ-ын мэргэжилтнүүд ажиллаж байгаа. Ирэх оны өдийд энэ 1.2 км зайд голыг урсгана гэсэн төлөвлөгөөтэй байгаа.

                                                                                                                        Э.Пагмадулам /top.mn/