Шалгалтад хамрагдсан 21 барилгаас нийт 94 зөрчил илэрснээс 50 орчим хувь нь угсралтад, 30 орчим хувь барилгын материалын чанар байдалд илэрчээ. Батлагдаж хянагдсан зураг төсөл, архитектур төлөвлөлтийн даалгаврыг зөрчиж барилгын хэмжээг томруулах, барилгын давхрын тоог нэмж даацыг төслийн хэмжээнээс хэтрүүлэх, захиалагчийн хүсэлтээр байгууламжийн хийц бүтээц, төлөвлөлтийг өөрчлөх, өртөг хэмнэх нэрийдлээр шаардлага хангахгүй материал, бүтээц хэрэглэж барилгын бат бөх чанарыг бууруулж, ашиглалтын үеийн аюулгүй байдлын шаардлагад сөргөөр нөлөөлөх нөхцлийг бүрдүүлсэн зэрэг нийтлэг зөрчлүүд илэрсэн байна.

Нэгэнт эхнээсээ стандарт хангаагүй зураг төслөөр угсралт нь  хийгдчихсэн байгаа барилгуудыг яах вэ гэдэг асуудал гарч ирнэ. Өөрөөр хэлбэл маргааш хэн нэгэн мөнгөө төлөөд амьдрахаар ороход чанарын шаардлага хангаагүй материалаар мэргэжлийн бус, зураг төслөөр угсралт хийсэн газруудыг торгоод л өнгөрөөчих үү гэдэг асуудал хамгийн хурцаар тавигдаж байгаа юм.

Нийслэлийн төвийн 6 дүүрэгт шинээр баригдаж байгаа барилгуудаас зураг төсөл, зөвшөөрөл, тавигдах шаардлагууд, норм дүрэм гээд бүх шаадлагыг зөрчсөн 4 аж ахуй нэгж байгууллагыг 5 хүртэлх сая төгрөгөөр торгоод л өнгөрчээ. Энэ мэт зөрчлүүд байнга илэрлээ гэх боловч таван цаасны торгууль тавихаас хэтрэхгүй байгаа нь барилгын компаниудад сануулга болохгүй байна. дараа нь чанаргүй баригдсан орон сууцанд орсон иргэн хохирвол өөрсдийнх нь хохь болоод өнгөрдөг гаж тогтолцоо хэдий болтол үйлчлэх вэ.