Монгол Улсын Зам, тээвэр, барилга, хот байгуулалтын сайд Х.Баттулга тэргүүтэй    төлөөлөгчид 2011 оны 07 дугаар сарын 18-наас 22-ны өдрүүдэд Япон Улсын   Гадаад хэргийн яамны урилгаар Япон Улсад албан ёсны айлчлал хийлээ. Сайдын айлчлалын бүрэлдэхүүнд яамны нэгжүүд болон иргэний нисэх, төмөр зам, далайн тээврийн асуудал эрхэлсэн харьяа байгууллагуудын удирдах албан тушаалтнууд болон хэвлэл мэдээллийн баг орж ажиллав. Энэ айлчлал нь ЗТБХБ-ын сайдын Япон Улсад хийсэн анхны албан ёсны айлчлал бөгөөд Монгол Улс, Япон Улсын хооронд дэд бүтцийн салбарт хамтын ажиллагааг өргөжүүлэн хөгжүүлэх зорилготой байлаа. Айлчлалын гол үр дүн нь Японы Газар, дэд бүтэц, тээвэр, аялал жуулчлалын сайд А.Охататай сайд нарын түвшний уулзалт хийж яам хооронд хамтран ажиллах тухай Санамж бичиг байгуулсан явдал боллоо. Сайд Х.Баттулга дагалдан яваа төлөөлөгчдийн хамт айлчлалын үеэр Японы Засгийн газар, парламентын гишүүд, дэд сайдууд, бусад төрийн болон олон нийтийн байгууллагууд, хувийн хэвшлийн пүүс компаниудын удирдлагуудтай ажил хэргийн уулзалт хийж хоёр улсын дэд бүтцийн салбарын хамтын ажиллагааг хөгжүүлэх асуудлуудаар санал солилцов. Айлчлалын үеэр Японы төр, засгийн байгууллагуудын төлөөлөгчид 3-р сард Японд тохиолдсон газар хөдлөлт, цунамигийн улмаас учирсан хохирлыг арилгахад Монголын Засгийн газар, ард түмэн тусламжийн гараа сунгасанд ихээхэн талархснаа илэрхийлж байлаа.

Газар, дэд бүтэц, тээвэр, аялал жуулчлалын сайд А.Охататай уулзав

Энэхүү уулзалт нь хоёр яамны сайд нарын түвшний анхны уулзалт болсон төдийгүй анх удаа хоёр яам хооронд хамтын ажиллагааны Санамж бичгийг байгуулснаараа ихээхэн ач холбогдолтой болов. Сайд нар хоёр талын дэд бүтцийн салбарын хамтын ажиллагааны өргөн хүрээний асуудлуудаар санал солилцож, хоёр улсын хооронд Стратегийн түншлэл бий болгоход хариуцсан салбаруудаар хамтын ажиллагааг өргөжүүлж хувь нэмрээ оруулахаар тохиролцон энэ ажлыг яам хоорондын хамтын ажиллагааны Санамж бичигт гарын үсэг зурж баталгаажуулж байгаад сэтгэл хангалуун байгааг илэрхийлж байв. Сайд Х.Баттулга Монгол Улсад өрнөж буй уул уурхай, дэд бүтцийн томоохон бүтээн байгуулалтын ажлуудын тухай дурьдаж тэдгээрт Японы тэргүүний технологи, хөрөнгө оруулалтыг татах сонирхолтой байгааг илэрхийлж үүнд түүний айлчлалын нэг зорилго оршиж байгааг мэдэгдэв. Сайд Х.Баттулгын зүгээс Санамж бичигт хоёр яамны эрхлэх асуудлуудын хүрээний бүх салбарт хамтран ажиллахаар тусгагдаж, хоёр яам жил бүр зөвлөлдөх уулзалт хийхээр тохирсны дагуу энэ жилд багтаан Монголд анхны уулзалтыг хийхийн төлөө ажиллахаар тогтов. Мөн тэрбээр хоёр улсын хооронд агаарын харилцааны хөгжил нь аялал жуулчлал, иргэдийн харилцаанд ихээхэн чухал тул “МИАТ” компанийн Японд хийх нислэгийн тоог нэмэх, зарим нислэгийг Токио хотын Ханеда нисэх буудалд буух боломжийг олгохыг санал болгож сайд А.Охатагийн зүгээс хоёр яам ийнхүү ойр дотно ажиллах боломж нээгдэж байгаад баяртай байгааг хэлж “МИАТ” компанийн нислэгийн тоог долоо хоногт 3 байгааг 5 болгон нэмэгдүүлэх зөвшөөрлийг олгож байгааг мэдэгдэв. Харин Ханеда нисэх буудал нь өөрийн хүчин чадлаас шалтгаалан ирэх 3 жилд нэмэлт нислэг авах боломжгүй байгааг мэдэгдэв. Сайд нар мөн спорт, эко аялал жуулчлал, иргэд харилцан зорчих явдал /визийн/ зэрэг асуудлуудаар санал солилцсов.

Төрийн стратегийн бодлогын сайд К.Гэнбатай уулзав

Сайд К.Гэнба Монголд 2011 оны 1 сард айлчлах үеэр уулзаж ярилцаж байснаа хэлж Японы Засгийн газраас Таван толгойн нүүрсний ордын ашиглалтын талаар ихэд анхаарч байгааг илэрхийлж Монголд өрнөж буй уул уурхайн салбарын эрчимтэй хөгжилд Японы тэргүүний томоохон компаниуд оролцохыг дэмжиж байгаагаа мэдэгдээд ашигт малтмалын олборлолт, тээвэрлэлт, боловсруулалт гэсэн асуудлуудыг цогц байдлаар шийдвэрлэх тухай Японы Засгийн газрын байр суурийг дахин нотолж, Японы тэргүүний технологи бүхий компаниудын оролцоо нь Монголын дэд бүтцийн бүтээн байгуулалт, хөрөнгө оруулалт гээд эерэг талууд байна. Мөн Монгол Улсын Ерөнхийлөгчийн айлчлалын үеэр хоёр тал тохиролцсон Стратегийн түншлэл хөгжүүлэх зорилгыг биелүүлэхэд ихээхэн ач холбогдолтой болохыг дурьдаж байв. Сайд Х.Баттулгын зүгээс айлчлалынхаа зорилгод дэд бүтцийн салбарын хамтын ажиллагааг шат ахиулах, уг төсөлд оролцох сонирхлоо илэрхийлсэн компаниудын хувьд илүү идэвх чармайлт гарган ажиллах, дотооддоо болон түнш орнуудтай тохиролцоо нарийвчилж нэг ойлголт, нэг байр суурьтай байх нь чухлыг онцлон тэмдэглэв.

Японы Олон улсын хамтын ажиллагааны байгууллага /Жайка/-ын дэд ерөнхийлөгч К.Кодератай уулзав

Төлөөлөгчид Монгол-Японы стратегийн түншлэлийг хөгжүүлэхэд чиглэсэн эдийн засгийн хамтын ажиллагааг бэхжүүлэх, ялангуяа Японоос Монголд үзүүлж буй хөгжлийн албан ёсны тусламжийн хүрээнд дэд бүтцийн салбарт хэрэгжсэн болон хэрэгжиж буй төслүүдийн талаар санал солилцов. Сайд Х.Баттулгын зүгээс Япон Улсад тохиосон байгалийн гамшиг, эдийн засгийн хүнд үед Монгол Улсад анхаарал хандуулсан хэвээр байгаад талархаж өөрийн хариуцсан чиглэлээр хэрэгжиж буй Улаанбаатар хотын шинэ нисэх буудлын төсөл, Төмөр зам дээгүүрх гүүрэн гарцын төсөл зэрэг төслүүдийн хэрэгжилтийн талаар мэдээлэл өгч төслүүдийг хугацаанд нь амжилттай хэрэгжүүлэхийн төлөө хоёр тал анхаарч ажиллахыг санал болгосны сацуу цаашид Япон Улсын зээл тусламжаар хэрэгжүүлэх зарим төслүүдийг санал болгов. Тухайлбал, Улаанбаатар хотын нийтийн тээврийн үйлчилгээнд шинэ систем нэвтрүүлэх боломжийг судлах, үүнд: метро, тусгай замын автобус, хөнгөн галт тэрэг /LRT,MRT/, мөн нийтийн тээврийн автобусын паркийг шинэчлэхэд автобус нийлүүлэх, Улаанбаатар хотын гүүрүүдийг шинэчлэхэд хамтран ажиллах саналтай байгааг илэрхийлэв. Жайка байгууллагын зүгээс Японы эдийн засаг хүнд байдалд байгаа хэдий ч Монголд хөнгөлөлттэй зээл олгох боломж хэвээр байгааг мэдэгдэж байв. Мөн Монголтой хамтран ажиллах дунд хугацааны хөтөлбөрийг боловсруулж байгааг дурьдаад одоо хэрэгжих буй төслүүдийг амжилттай дуусахад анхаарах бөгөөд сайдын зүгээс санал болгосон төслүүдийн талаар судалгааны багийг монголд илгээхээр шийдвэрлэв. Түүнчлэн сайд Х.Баттулга айлчлынхаа хугацаанд Японы бусад төрийн болон олон нийтийн байгууллагуудтай ажил хэргийн уулзалтууд хийлээ. Тухайлбал: Японы Парламентын гишүүн Иссей Кога, Рёоко Тани, И.Озава, Гадаад хэргийн дэд сайд И.Ямахана, Газар, дэд бүтэц, тээвэр, аялал жуулчлалын дэд сайд Т.Койзүми, Эдийн засаг, худалдаа, аж үйлдвэрийн дэд сайд Т.Мацушита, Японы олон улсын найрамдал солилцооны нийгэмлэг, Японы Жүдогийн холбоо, Иргэний агаарын тээврийн АNA компани, Nippon Steel, Сумитомо, Марубени, Мицуй, төмөр замын суурь бүтцийн технологийн чиглэлээр үйл ажиллагаа явуулдаг Central Techno, Nihon Kido, Marujyou, Hakusan зэрэг компаниудтай уулзаж хамтын ажиллагааны асуудлуудаар санал солилцов. Мөн тэрбээр айлчлалын хүрээнд газар хөдлөлт, цунамид нэрвэгдсэн Мияги мужийн Натори, Сэндай хотод зочилж байгалийн гамшгийн хохирлыг арилгах, сэргээн босголтын үйл ажиллагаатай танилцав. Сендай хотын нисэх буудал болон Токио хотын Ханеда нисэх онгоцны буудлын үйл ажиллагаатай мөн танилцсаны сацуу Монгол Улсаас Япон Улсад суух Өргөмжит консулыг томилох ёслолд оролцож, Японы Никкей сонинд ярилцлага өгөв. Сайд Х.Баттулгыг дагалдан явсан төлөөлөгчид өөрсдийн чиглэлээр тусгайлсан ажлын уулзалтууд хийж ажиллав. Тухайлбал: Японы иргэний агаарын тээврийн ANA, JAL компаниуд, Японы Далайн захиргаа, Японы Хөлөг онгоцны бүртгэлийн компани, г.м. Зам, тээвэр, барилга, хот байгуулалтын сайд Х.Баттулгын Япон Улсад хийсэн энэ удаагийн албан ёсны айлчлал нь цаг үеэ олсон, зорилго, утга агуулгын хувьд өндөр ач холбогдолтой айлчлал боллоо. Энэхүү айлчлал нь Монгол-Японы дэд бүтцийн салбарын хамтын ажиллагааг шат ахиулж салбарын яамд хооронд анхны сайд нарын түвшний уулзалт хийж хамтын ажиллагааны анхны Санамж бичгийг байгуулснаар салбарын харилцаа, хамтын ажиллагааг илүү өргөжүүлэх нөхцөл боломжийг нээж өглөө.Түүнчлэн хоёр улсын хооронд итгэлцэл, хамтын ажиллагааг бүх салбарт бэхжүүлэх ялангуяа, спорт, аялал жуулчлалыг салбарт харилцааг хөгжүүлж, иргэдийн солилцоог нэмэгдүүлэхэд тодорхой хувь нэмрийг оруулж чадлаа.