Ази-Номхон далайн Газар зүйн мэдээллийн системийн дэд бүтцийн байнгын хорооны 17-р хурал Монголд боллоо.
Ази-Номхон далайн Газар зүйн мэдээллийн системийн дэд бүтцийн байнгын хорооны 17-р хурал 2011 оны 07 дугаар сарын 21-22-нд Улаанбаатар хотод амжилттай болж өндөрлөлөө. Хуралд Япон, БНХАУ, Малайз, БНСУ, ИРан, Бруней, Сингапур, Индонези зэрэг 10 орны 29, дотоодын 21 төлөөлөгч оролцов. Гадаад орнуудын Үндэсний хэмжил, зураглалын байгууллагын дарга нарыг дагалдан гадаад харилцааны ажилтан, хэлтэс, газрын дарга, холбогдох мэргэжилтнүүд Монголд ирсэн юм.
Хурлыг нээж Ази-Номхон далайн Газар зүйн мэдээллийн системийн дэд бүтцийн байнгын хорооны ерөнхийлөгч болон ЗТБХБЯ-ны Төрийн нарийн бичгийн дарга Ж.Бат-Эрдэнэ, ГХБГЗЗГ-ын дарга Ц.Ганхүү нар үг хэлж, Ази-Номхон далайн Газар зүйн мэдээллийн системийн дэд бүтцийн байнгын хорооны гүйцэтгэсэн ажлын тайлан, Олон улсын хэмжил зураглаачдын холбооны ерөнхийлөгчийн илтгэлийг сонссон юм. Мөн улс тус бүр өөрийн илтгэлээ тавьж хуралд оролцогчдын сонирхсон асуултад хариу өгсөн.
Тус 17-р хурлыг Монголд зохион байгуулах тухай шийдвэрийг 2010 оны 10-р сард Сингапур улсад зохион байгуулагдсан гүйцэтгэх зөвлөлийн 16-р хурлаар хэлэлцэж баталгаажуулсан бөгөөд энэ талаар ЗТБХБ-ын Сайдын 2011 оны 01 дүгээр сарын 17-ны өдрийн 18 тоот тушаал гарсан юм.
Ази-Номхон далайн Газар зүйн мэдээллийн системийн дэд бүтцийн байнгын хорооны 18-р хурлыг Малайзад зохион байгуулахаар дээрх хурлаас шийдсэн билээ.
Хурлын үр дүн
Хурлын өмнөх өдөр Австрали, Иран улсын хэмжил зураглалын байгууллагын төлөөлөгчид өөрийн орны туршлагаас танилцуулан хамтран ажиллах талаар байгууллагын удирдлага болон мэргэжилтнүүдтэй уулзаж ярилцав.
БНСУ-ын Үндэсний орон зайн мэдээллийн агентлагтай хамтын ажиллагааны гэрээ байгуулав.
БНСУ-ын Газар, далай, тээврийн яамны төлөөлөгчидтэй танилцуулга, уулзалт хийв.
Ази-Номхон далайн Газар зүйн мэдээллийн системийн дэд бүтцийн байнгын хорооны 17 дугаар хурлын шийдвэрт манай орны зүгээс 4 санал оруулж 1 саналыг эцсийн шийдвэрт тусгасан болно.
Хурал зохион байгуулах үүрэг бүхий ажлын хэсэг хуралдаж хурал зохион байгуулалттай холбоотой асуудлаар ярилцаж гарсан алдаа дутагдлыг хэлэлцлээ.
Хуралд тавигдсан илтгэлүүдийг монгол хэл дээр орчуулж Монгол Улсын Үндэсний орон зайн мэдээллийн дэд бүтцийн чиг хандлагыг тогтоон зөвлөмж гаргах үүрэг бүхий ажлын хэсгийг Газрын даргын 2011 оны 07 дугаар сарын 25-ны өдрийн 347 тоот тушаалаар байгуулан төлөвлөгөөний дагуу ажиллаж байна.