“Нийслэл Улаанбаатар хотын 2040 он хүртэлх хөгжлийн ерөнхий төлөвлөгөөг батлах тухай” УИХ-ын тогтоолын төслийг хэлэлцэхийг дэмжлээ. Нийслэлийн 2040 оны хөгжлийн ерөнхий төлөвлөгөөг хэрэгжүүлэхэд 242 их наяд төгрөгийн хөрөнгө оруулалт шаардлагатай. Үүний 120 их наяд төгрөгийг улс болон нийслэлийн төсөв, гадаадын зээл тусламж, бондын хөрөнгөөр санхүүжүүлнэ. Үлдсэнийг нь хувийн хэвшлийн хөрөнгө оруулалтаар хийхээр төлөвлөснийг Нийслэлийн Засаг дарга бөгөөд Улаанбаатар хотын Захирагч Х.Нямбаатар мэдээллээ. 

Нийслэлийн дулаан, эрчим хүчний сүлжээний шинэчлэлийг бүрэн шийдвэрлэхэд хоёр тэрбум гаруй ам.долларын хөрөнгө оруулалт шаардлагатай

2035 он гэхэд Улаанбаатар хотын эрчим хүчний үндсэн хэрэглээ 3000 мегаваттыг давна. Одоогоор 1000 гаруй мегаваттай явж байгаа бөгөөд 2040 он гэхэд цахилгаан хангамжийг 5408 мегаватт дулааны эх үүсвэрийг 7480 мегаватт хүргэж, 15 байршилд дулааны эх үүсвэр байгуулахаар төлөвлөсөн.

Мөн авто замын сүлжээг хэвтээ найм, босоо 12, тойрог гурван замын бүтэцтэй байхаар төлөвлөж, нийтийн тээврийн хүртээмжийг нэмэгдүүлэхийн тулд Энхтайваны өргөн чөлөөний дагуу 17.7 км урт 14 өртөө бүхий Улаанбаатар Метроны нэг, хоёрдугаар шугам байгуулахаар төлөвлөөд байна.

2040 онд нийслэлд хоёр сая гаруй хүн оршин суухаар тооцож, нийтийн тээврийн хүртээмжийг хоёр дахин нэмэгдүүлж, ажлын байрны тоог 1.4 дахин нэмэгдүүлэх зорилтыг хөгжлийн төлөвлөгөөнд тусгасан байна.