Улаанбаатар хотын агаар, орчны бохирдол, авто машины түгжрэл, иргэдийн амьдралын чанар дээшлүүлэх зорилтын хүрээнд хэрэгжүүлэх мега төслүүдийг эрэмбэллээ.
     Тодруулбал, Засгийн газар 2025 оныг “Нийслэлийн дэд бүтцийн хөгжлийг дэмжих жил” болгон зарлаж, нийслэлийн агаар, орчны бохирдол, авто машины түгжрэл, иргэдийн амьдралын чанар дээшлүүлэхэд чиглэсэн төслүүдийг үр ашгийн хувьд эрэмбэлсэн жагсаалтыг дэмжин төсөл хөтөлбөр хэрэгжүүлэхдээ тус эрэмбийн дагуу төлөвлөн ажиллахыг Монгол Улсын сайд, 20 минутын хот Үндэсний хорооны дарга Р.Эрдэнэбүрэн, Нийслэлийн Засаг дарга бөгөөд Улаанбаатар хотын Захирагч Х.Нямбаатар нарт шаардлагатай дэмжлэг үзүүлэхийг Засгийн газрын гишүүдэд даалгалаа.
     Мөн мега төслүүдийн техник эдийн засгийн үндэслэл, техникийн зураг төсөл болон төсөвт магадлал хийх ажлыг шуурхай зохион байгуулахыг холбогдох албан тушаалтнуудад даалгалаа. 
Эрэмбэлсэн мега төслүүдийг “Нийслэл Улаанбаатар хотын 2040 он хүртэлх хөгжлийн ерөнхий төлөвлөгөө”, Монгол Улсын урт хугацааны хөгжлийн бодлого “Алсын хараа-2050”, дунд хугацааны “Шинэ сэргэлтийн бодлого” зорилтот хөтөлбөр, “Монгол Улсын Засгийн газрын 2024-2028 оны үйл ажиллагааны хөтөлбөр”-т заасан 14 мега төсөлтэй уялдуулан хэрэгжүүлэх юм.
Нийслэл Улаанбаатар хотын агаарын бохирдол бууруулах, дэд бүтцийн бүтээн байгуулалтын төсөл, арга хэмжээ хэрэгжүүлэхэд дэмжлэг үзүүлэх, салбар хоорондын зохицуулалт, шуурхай удирдлагаар хангах Шуурхай штабыг Ерөнхий сайдаар ахлуулан байгуулсан. 

Шуурхай штабын хоёрдугаар хуралдаан нэгдүгээр сарын 18-ны бямба гаригт болж нийслэл Улаанбаатар хотод хэрэгжүүлэх төслүүд болон нөлөөллөөр нь хэрхэн эрэмбэлсэн болон түгжрэл бууруулах, агаарын бохирдол бууруулах, дэд бүтцийн холбогдолтой төсөл гэж үндсэн гурван хэсэгт хуваан Засгийн газрын хуралдаанд танилцуулах нь зүйтэй гэж үзсэн юм.