Нэгдсэн үндэстний боловсрол, шинжлэх ухаан, соёлын байгууллагын /ЮНЕСКО/ UNITWIN олон улсын хөтөлбөрийн хүрээнд Санхүү эдийн засгийн дээд сургууль Бүгд найрамдах Солонгос улсын Хандоны Глобаль Их сургууль хамтран 2011 оны 8-р сарын 1-3-ны өдрүүдэд “Хот төлөвлөлтийн хөгжлийн олон улсын семинар-хэлэлцүүлэг”-ийг зохион байгууллаа.

Тус семинарийн үеэр “Хотын орон сууцны төсөл болон санхүүжилт”, “Улаанбаатар хотын зам тээврийн харилцаа”, “Хот төлөвлөлт болон зураг төслийн тухай ойлголт”, “Монгол дахь ядуурал болон орон сууцжуулалт”, “Хот ба эдийн засгийн хөгжил” сэдвээр илтгэл тавигдаж, хэлэлцүүлэг хийгдсэн. “Хот төлөвлөлтийн хөгжлийн олон улсын семинар-хэлэлцүүлэг”-т оролцсон төлөөлөгчид буюу Хандоны Глобаль сургуулийн профессор Chamun Koo, доктор профессор James Davis, John Soo Choi болон тус сургуулийн оюутнууд өнөөдөр Хангарьд ордоны 13 давхарт байрлах Хот байгуулалтын үзэсгэлэнг үзэж сонирхлоо. Мөн манай газрын орлогч дарга Э.Анар, Хот байгуулалтын хэлтсийн дарга О.Одбаяр, Хот төлөвлөлт, эдийн засгийн хэлтсийн дарга Р.Баяр, Барилга, байгууламжийн чанар, аюулгүй байдлын хэлтсийн дарга Х.Батбаатар, мэргэжилтэн В.Мөнхжаргал, Г.Дарханчулуун нар төлөөлөгчидтэй уулзаж Улаанбаатар хотыг 2020 он хүртэл хөгжүүлэх Ерөнхий төлөвлөгөөний тодотголын ажил болон 2030 оны хөгжлийн үзэл баримтлалын талаар цаашлаад нийслэлийн хөгжлийн өнөө ба ирээдүйн талаар санал солилцлоо.