Испани Улс орон сууцны хямралыг шийдвэрлэх бодлогын хүрээнд Их Британи, АНУ зэрэг Европын холбооны гишүүн бус орны оршин суугчдын татварыг 100 хувь болгон нэмэгдүүлэхээр төлөвлөж байна. Түүнчлэн хямд орон сууцаар хангадаг түрээслэгчдийг татвараас чөлөөлөх, 3 мянга гаруй байшин барилгыг нийтийн орон сууцны байгууллагад шилжүүлэх, жуулчдыг байрлуулдаг орон сууцнуудад тавих зохицуулалтыг чангатгах, өндөр татвар ногдуулах зэрэг багтаж байна. Энэ нь орон сууцны хүртээмжийг сайжруулахын тулд Ерөнхий сайд Педро Санчесын зарласан олон арга хэмжээний нэг юм.

Ерөнхий сайд Педро Санчес Мадридад болсон эдийн засгийн чуулга уулзалтад оролцох үеэрээ Ервопын холбооны гишүүн бус улсуудын иргэд 2023 онд Испанид 27 мянга гаруй үл хөдлөх хөрөнгийг амьдрахын тулд биш харин мөнгө олохын тулд худалдаж авсан байна. Орон сууцны хомсдол үүсээд буй энэ үед үүнийг хүлээн зөвшөөрөх боломжгүй. Иймээс дээрх алхам нь орон сууцыг нэн түрүүнд Испанийн иргэдэд олгоход чиглэсэн гэдгийг онцоллоо.

Мөн тэрээр урьд хожид авч байгаагүй энэ арга хэмжээ нь тус улсын орон сууцны зах зээлд үүссэн онцгой нөхцөл байдлыг засаж залруулахад зайлшгүй шаардлагатай бөгөөд баян газрын эзэд ба ядуу түрээслэгч гэсэн хоёр ангид хуваагдсан нийгмийг бий болгохгүйн тулд авч буй арга хэмжээ гэж хэлжээ.

П.Санчес татварыг хэрхэн ногдуулах талаар дэлгэрэнгүй мэдээлэл өгөөгүйгээс гадна хуулийг батлуулахаар парламентад өргөн барих хугацааг дурдаагүй байна. Түүний засгийн газар уг саналыг нарийвчлан судалсны дараа эцэслэнэ гэж мэдэгджээ.