Япон Улсын төрөлт одоогийнхоороо үргэлжилбэл 695 жилийн дараа ганц хүүхэдтэй үлдэнэ гэх тооцооллыг Тохоку их сургуулийн Насны эдийн засаг, нийгмийн судалгааны төвийн профессор Хироши Ёшида гаргажээ. Хироши Ёшида нь хүүхдийн тоо хэзээ “нэг” болтлоо цөөрөх тухай 2012 оноос хойш жил бүрийн дөрөвдүгээр сард тооцооллыг гаргаж байгаа юм. Түүний судалгаанаас харахад тус улс 14 ба түүнээс доош насны ганцхан хүүхэд байх хугацааг  2821 оны 10-р сарын 27-нд гэж тооцоолж байсан боловч уг тооцоолол 100 жилээр урагшилж 2720 оны нэгдүгээр сарын 5-нд тохиох гэнэ. Энэхүү сүүлийн тооцооллыг 2024 оны төрөлтийн статистикт үндэслэн хийсэн байна. Судалгааны хүрээлэнгүүдийн урьдчилсан мэдээгээр 2024 онд нярайн тоо анх удаа 700 мянгаас доош үзүүлэлтэй гарсан нь,  2038 онд гарах ёстой тооцоолол байв. 

Төрөлтийн тоо хурдацтай багасаж байгаа нь Япон Улсын ажиллах хүчний хомсдолын гол асуудал болж байгаа юм. Хамгийн залуу ажиллах хүч болох 20-24 насныхны тоо сүүлийн 30 жилд 36% буурсан бөгөөд нөхцөл байдал энэ чигээрээ үргэлжилбэл тус улс 11 сая ажилчдын хомсдолтой тулгарах нөхцөл үүсэх юм. 

Иймд Японы компаниуд шинэ төгсөгч нарыг татахдаа сургалтын төлбөрийн зээлийг нь төлөх, орон сууцны зээл авахад туслах байдлаар татах бодлого хэрэгжүүлж эхэлсэн байна. Мөн  тус улсад их сургуульд сурч буй оюутнуудад ажлын санал ирэх нь ихэссэн төдийгүй энэ 3-р сард төгсөх оюутнуудын 40% нь ямар нэгэн байдлаар бүтэн цагийн ажлын санал авч дээд амжилт эвдсэн байна. 

Үүний нэг жишээ нь Японы хамгийн том даатгалын компанийн нэг болох Nippon Life 2023 онд эрэгтэй ажилчдадаа зориулан 200 өрөөтэй барилга барьж, түрээснийх нь ⅓-ээс ч бага хувийг төлөх боломж олгож байжээ. Харин эмэгтэй ажилчдаа хөнгөлөлттэй орон сууцаар хангадаг төдийгүй өглөө, өдөр, оройн хоол, кафе, саунаар үйлчлүүлэх  зэрэг бусад урамшуулалтайгаар ажлын байр санал болгож эхэлсэн байна.