Цахилгааны үнэ нэмэгдвэл зуухаа оруулж ирнэ гэж байгаа айлуудыг буруутгах хэцүү… БЭЛТГЭЖ БАЙЖ ШИЙДВЭР ГАРГАДАГГҮЙ ЮМ УУ?

Эрчим хүчний салбар алдагдалтай явааг өнөөдөр мэдсэн юм биш. Өнө үргэлжилж, угжирсан асуудал. Нийслэлийн гэр хороололын монгол гэрүүд, наад захын стандартгүй барьсан байшингууд маань ямар их дулаан алдагдалтайг төр эртнээс мэдэж байсан хэрнээ, хэвлээд гаргачихсан АОС-ын стандартаа мөрдүүлэх ямар ч ажил хийгээгүй. Шөнийн тариф гэх зүйлээр аргалах гэж оролдсон ч асуудлын үнэн учигийг олоогүй. Одоо энэ нь ч бодит нэмэргүйг хүмүүс ойлгож эхэлсэн. Гагцхүү улс төрийн, сонгуулийн оноо авахын тулд уг асуудлыг удаа дараа хойшлуулсаар ирсэн. Сонгуульд л ялчихвал гэж сэтгэсэн. Мэдээгүй, мөнгө байгаагүй гэвэл мэдэх хүмүүс нь итгэхгүй!

Цахилгааны үнэ өсгөхийн өмнө гэр хороололыг дулаалах багц ажлуудыг яагаад хийгээгүй юм.

Зуух, түлшинд өгсөн татаасыг яагаад барилгын салбарт өгч дулаалах кампанит ажил хийгээгүй юм.

Эх орны тань байшин барилгыг яагаад зөвхөн гадны төслүүд дулаалж явдаг юм.

Ард түмнийг цогцоор нь буруутгавал бас бүтэхгүй шүү. Буруутай ард түмэн гэж байдаггүй юм, буруу шийдвэр гаргасан төр л гэж бий. 

Учир нь нэгж хүний ухаараагүй зүйлийг түрүүлж хараад тултал шийдээсэй гэж ТӨР-ийг бид сонгодог биш бил үү? Харалган төрийн санаатай алдааг бид хүүхдүүд, хорт хавдар хэзээ нэгэн цагт тусах уушигаараа төлж дуусгана даа