Дэлхийн эдийн засгийн форумын (WEF) 2025 оны Хөдөлмөрийн зах зээлийн төлөвийн тайланд 2030 он гэхэд 78 сая ажлын байр шинээр бий болно гэж тооцоолжээ. Нийт 1000 гаруй компаниас цуглуулсан дата мэдээлэлд тулгуурлан 2030 он гэхэд олон улсын хэмжээнд 170 сая ажлын байр нэмэгдэх төлөвтэйг тооцоолсон байна. Технологийн дэвшил эрчимжиж байгаатай холбоотойгоор тухайн салбарт хамгийн их ажлын байр бий болно гэж үзэж байгаа аж.

Харин 92 сая ажлын байрыг цомхотгох тооцоо гарсан байна. Ингэснээр цэвэр дүнгээр дээрх тооны ажлын байр шинээр бий болохыг тус тайланд дурдагджээ.

Салбараар нь аваад үзвэл 2030 он гэхэд ферм, хүргэлтийн үйлчилгээ болон барилгын салбарын ажилчдын эрэлт хэрэгцээ хамгийн өндөр байх төлөвтэй байгаа аж.

Үүнээс гадна сувилахуйн мэргэжилтэн, ерөнхий боловсролын багш зэрэг нарийн мэргэжлүүдийн эрэлт ч мөн нэмэгдэхээр байгааг тодотгосон байна.

Харин хиймэл оюун, сэргээгдэх эрчим хүч  хөдөлмөрийн зах зээлийн бүтцийг хурдацтай өөрчилж байгаатай холбоотой график дизайнер болон кассчин, захиргааны зөвлөх ажилтан зэрэг ажлын байрны эрэлт хамгийн хурдацтай буурч байгааг Дэлхийн эдийн засгийн форумын 2025 оны Хөдөлмөрийн зах зээлийн төлөвийн тайланд онцолжээ.